Footer

BANNER: No. 1 drug personality ti Sinait, naaresto iti manhunt operation

SINAIT, Ilocos Sur – Lalo a dimmagsen ti kaso a sanguen daytoy numero uno a drug personality ditoy nga ili gapu ta natiliwan nga adda ikutna a paltog idi inarestar dagiti polis sadiay Barangay Marnay idi malem ti Enero 25.

Nangiwayat ti nagtipon nga elemento ti CIDG Ilocos Sur, PIB Ilocos Sur, Ilocos Sur PPSC, Maritime, PAIDSOTG ken Sinait police station iti manhunt operation a nagresulta iti pannakaaresto ni Joseph Mercado y Agdeppa, 29, naasawaan, ex-CAFGU, kalpasan a nangiyisio ni Judge Raphiel F. Alzate ti Regional Trial Court, Branch 24, Cabugao, Ilocos Sur iti warrant of arrest gapu iti kasona a frustrated murder.

Nairekomenda nga agpiansa ni Mercado iti P200,000.00 para iti temporario a wayawayana.

Segun iti report, nakasamsam pay dagiti polis iti homemade Smith and Wesson Caliber 357 iti ikut ni Mercado a nagkarga iti uppat a bala.

Nakalista a numero uno a drug personality iti Sinait police station, karaman pay ni Mercado iti target list ken miembro iti Igne-Rosete-Group.

Naipan ni Mercado agraman ti nakumpiska kenkuana iti Ilocos Sur CIDG office para iti dokumentasion sakbay ti pannakaipaimana iti korte.

Iti pannakaisurat daytoy, maisagsagana ti kaso a panaglabsing iti RA 10591 maikontra iti akusado.#