Footer

Barangay kagawad, pinaltogan ti lolona

BURGOS, Ilocos Sur – Susik ti pamilia ti maitudo a gapu ti nangpaltogan ti maysa a lakay iti apona.

Nabigbig ti biktima a ni Christopher Abalos y Tamayo, 35, naasawaan, barangay kagawad, idinto a ni Lorenzo Abalos y Dayap, 83, naasawaan, mannalon, ti nangpaltog kenkuana.

Segun iti report, aggiinom da Abalos ken gagayyemna iti balayda idi adda nagkanalbuong sa kinuna ti biktima nga “adda tamak”.

Mapapati nga idi timmaliaw ti biktima iti likudanna, nakitana ti lolona nga agtartaray nga umadayo nga adda iggemna a paltog.

Naitaray ti biktima iti Ilocos Sur District Hospital, Narvacan, para iti pannakaagas ti sugatna iti makannigid a takiagna idinto nga inaresto met dagiti nagresponde a polis ti lakay.

Nakarekobre dagiti otoridad ti maysa a carbine nga awanan serial number, maysa a kapsula ken 8 a bala ti nasao a paltog iti crime scene.

Naammuan nga adda susik iti napalabas ti suspek ken ti nagannak ti biktima.#

Comments are closed.