Footer

Drug surrenderee, napapatay

VIGAN CITY – Mapapati a sinurot ti suspek daytoy biktima sana pinaltogan bayat ti panagdaliasatna iti Liberation Boulevard ditoy siudad idi agsapa ti Enero 23.

Intaray dagiti nagresponde a polis ni Eric Follosco Filart, aka “Tikboy”, 43, naasawaan, ken residente iti Barangay Cabalangegan, Vigan City, Ilocos Sur, iti Gabriela Silang General Hospital ngem pimmusay daytoy bayat ti pannakatamingna idi agarup 8:20 iti dayta met la a bigat.

Iti inisial a panagimbestiga dagiti polis, agdaldaliasat ni Follosco iti Liberation Boulevard a nakasakay iti Yamaha Mio 125 a motorsiklona, idi pinalikudan a paltogan ti suspek a naglugan iti single motorcycle iti sumagmamano a daras .

Naglibas ti di nabigbig a suspek kalpasan ti panangpaltogna ken ni Follosco ket nupay nangiwayat dagiti polis iti hot pursuit operation, negatibo ti resultana.

Iti panangproseso ti Ilocos Sur Provincial Crime Laboratory Office iti crime scene, nakarekobreda iti innem a kapsula manipud iti cal. 45, maysa a metallic fragment, ken maysa a buli.

Segun iti polis, maysa a drug surrenderee ti biktima idi Hulio 13, 2016 ken adda iti babaen ti Vigan drugs watch list.

Kabayatanna, agpapaimbag iti ospital ti barangay kagawad a pinaltogan ti kalugaranna idi malem ti Enero 23.

Agur-urnos iti lumber ni Ruben Pajo y Jasmin, 52, naasawaan, residente iti Barangay Purok-a-Bassit, Vigan City idi agarup 5:40 ti malem ti Enero 23 idi kellaat a nagparang ti suspek sana pinaltogan ti kagawad babaen ti homemade shotgun a nakadunoran dagiti agsumbangir a takiag ti biktima.

Naglibas ti suspek a nabigbig idi agangay a maysa a Rhannie Riveta Paa, 42, balo, drug surrenderer kalpasan ti pammaltog iti saanmo a direksion, kuyogna ti paltog ket nupay sinapul dagiti polis ken pinakdaaranda dagiti kabangibangda a police stations, saanda pay a natiliw ti suspek.

Nakarekobre ti SOCO PPO iti crime scene iti uppat a metallic fragments manipud iti nadakamat a paltog.

Agtultuloy ti panagimbestiga dagiti polis mainaig iti nasao a pammaltog. (Tawid News Team)

Comments are closed.