Footer

MISS UNIVERSE PAGEANT ITI PILIPINAS

Komentario ni Eden A. Alviar

ADU a Pilipino dagiti magagaran ken maayatan iti pannakaangay ditoy pagilian ti maika-65 a Miss Universe Beauty Pageant a pagsasalipan dagiti agkakapintas a babbalasang manipud kadagiti 87 a pagilian iti lubong. Maangayto ti koronasion sadiay Mall of Asia Arena, Pasay City, Metro Manila inton Enero 30, 2017

Ngem adda met grupo dagiti babbai pakaibilangan ti Gabriela a komonkontra ti pannakaangay ti pasalip ditoy pagilian ta ibilangda dayta a pagteng a kasla mangibaba ti dayaw dagiti babbai ta maus-usarda ken ti kinapintasda para ti pannakaitandudo ti tarigagay dagiti komersiante ken tattao nga addaan iti managimbubukod nga interes. Mamatida a ti pannakaangay ti Miss Universe Pageant iti Pilipinas a dagiti kandidata ket mausarda kas modelo ti kinapintas, ken mapili ti mangabak babaen kadagiti hurado a ti pagrukodanda ket ti pisikal a kinapintas, kurba iti pisikal a bagi, kinabagas dagiti sungbatda kadagiti saludsod, ken kinasayaat ti pannagna ken panagkawesda kabayatan ti panagrampa wenno pannakaiparangda a kandidata.

Nagbalinen a paset ti kultura dagiti Pilipino ti panagaayatda kadagiti beauty pageants pakairamanan ti Miss Universe contests, ken dadduma pay a kangrunaan nga internasional a pasalip kas ti Miss World, Miss International, Miss Earth ken dadduma pay a salisal ti kinapintas. Ipaneknek daytoy ti panangabaken dagiti Pilipina kadagitoy a titulo kalaksidan pay ti panangabak dagiti adu a runner-ups.

Manipud idi nabukel ti Miss Universe Pageant idi 1952, tallon a Pilipina dagiti nakoronaan a reyna a da Gloria Diaz ti La Union idi 1969, Margarita Moran ti Manila idi 1973 ken ni Pia Wurtzbach ti Cagayan de Oro City idi napalabas a pasalip. Maysa metten a Pilipina ti nakoronaan a Miss World idi 2013 a ni Megan Lynne Young. Innem metten dagiti nangabak a Miss International a da Gemma Teresa Cruz idi 1964, Aurora Pijuan idi 1970, Melanie Marquez idi 1979, Precious Lara Quigaman idi 2005, Bea Rose Santiago idi 2013, ken Kylie Verzosa itay 2016. Iti met Miss Earth Pageant a nabukel iti Pilipinas ket addan tallo a Pilipina a nangabak iti korona a da Angela Gabrena Ong idi 2015, Jamie Herrel idi 2014, ken Karla Paulo Henry idi 2008.

Maikatlon a daras daytoy a tawen a maangay ti Miss Universe Pageant ditoy Pilipinas, immun-unan idi 1974 sadiay Cultural Center of the Philippines, Pasay City; ken idi 1994 sadiay Philippine International Convention Center, Pasay City. Ibilang dagiti opisial ti gobierno dagitoy a pasken a naindaklan a wagas iti panangi-promote ti turismo iti pagilian. Itoy a pasalip, pinatalgedan dagiti opisial ti Department of Tourism nga awan ti gastosen ti gobierno, ngem aggapu amin iti pribado a sektor nangruna ti sponsor. Naipadamag a ti major sponsor ket nag-invest iti US$ 11 million para itoy a pasken.

Mamati dagiti DOT officials ken ti sponsor a dakkel ti maipaay ti pannakaangay ti Miss Universe Pageant iti Pilipinas ta ti live broadcast laengen ti pageant ket dumanon iti 500 million dagiti live viewers iti intero a lubong. Ditoy Pilipinas ket maipabuya a live kadagiti amin a television networks. Sabali pay kadagiti social media ken international networks a mangi-coverage iti beauty pageant.

Adu met dagiti lokal a negosio a mabenepisiaran iti Pilipinas iti panagbisita dagiti kandidata kadagiti nagduduma a lugar iti Pilipinas pakairamanan ti Vigan City iti Ilocos Sur ken Davao City. Iti kaadda dagiti kandidata kadagiti nalatak a lugar iti Pilipinas ket adu a pribado a negosio ken agindeg dagiti mabenepisiaran.

Iti panagkita dagiti komonkontra iti pannakaangay ti Miss Universe Pageant iti Pilipinas ket maysa a nakanginngina ken nabarayuboy daytoy a pasken iti sango ti kinarigat ti biag dagiti kaaduan a Pilipino. Ibilangda a maysa a wagas daytoy a salisal ti kinapintas tapno mailemmeng dagiti nalaad a mapaspasamak iti pagilian kas ti kinapanglaw ken dagiti agtultuloy a pammapatay wenno extra judicial killings gapu iti kampania ti gobierno kontra illegal a droga.

Patienda a saan a pudno nga awan ti gastosen ti gobierno iti pannakaangay ti Miss Universe Beauty Pageant iti Pilipinas. Uray pay adda pondo ti Miss Universe Organization ken sponsor, saan a mailibak a mausar latta ti resources ti gobierno. Saan kadi a gobierno ti mangsueldo kadagiti kameng ti Philippine National Police ken dagiti dadduma pay nga ahensia ti gobierno nga agtrabaho iti pannakapatalged ti seguridad dagiti kandidata, ken mangtagiben ti urnos ken talna kadagiti disso a pagpasiaran dagiti kandidata ken iti pakaangayan ti pasalip? Dagiti alikamen nga usaren dagiti pulis iti pannakapatalged ti seguridad, saan kadi a kukua ti gobierno?

Manamnama a kabayatan ti pannakaangay ti Miss Universe Pageant ket mailemmeng manen ti langa ti kinapanglaw dagiti Pilipino sadiay Metro Manila. Matiliw manen dagiti agpalpalama ken dagiti agbibiag kadagiti kalsada. Marebba manen dagiti barongbarong ken dakes a pasilidad a maibilang nga eyesore kadagiti sangaili. Maipasiarda laeng kadagiti disso a natalged ken napintas ket saanda a makita ti nalaad a langa ti Pilipinas. Masangaili a nasayaat dagiti kandidata, ken agbibiagda a kas reyna, mangan kadagiti agkakaimas a taraon, agaruatda kadagiti agkakangina a kawes.

Iti laksid dagiti nangayed a mabuya nga itden ti Miss Universe Pageant iti pagilian, adu a Pilipino dagiti mapennek dagiti matada nga agbuya ti kinalibnos dagiti kandidata. Ngem iti kadagupan dagiti 105 million a Pilipino iti pagilian ken kadagiti nagduduma a paset iti lubong ket kaaduanna ti agbibiag iti kinapanglaw. Adu kadakuada dagiti awanan ti kabukbukodan a pagtaengan ken manglangan a mangan. Dagita ti pudno a langa ti pagilian a malingdan kabayatan ti pannakaangay ti Miss Universe Pageant iti pagilian.#

Comments are closed.