Footer

EDITORIAL: Panangdalus kadagiti Dakes a Kameng ti PNP

TO SERVE and protect. Daytoy ti motto ken akem dagiti amin a kameng ti Philippine National Police kadagiti umili ken iti pagilian.

Ngem iti laksid ti aglaplapusanan a suporta iti PNP ni Presidente Rodrigo Duterte, ken panangikagkagumaan ni Chief PNP Director General Ronald dela Rosa a pasayaaten ti imahe ti institusion ken isubli ti naan-anay a talek dagiti umili, adda dagiti pasamak a pakainanaigan dagiti sumagmamano a kameng a nangpiltak manen iti dayaw dagiti polis.

Mainayon kadagiti saan a masolsolbar a krimen nangruna dagiti mapapati nga extrajudicial killings wenno death under investigation manipud idi agakem ti agdama nga administrasion ket maysa a nadagsen a krimen ti napasamak a mapapati a nakainaigan dagiti kameng ti PNP. Nakababain daytoy a pasamak a nakakidnapan ken nakapapatayan ti maysa a South Korean a ni Jee Ick-joo, 53, negosiante ken retirado a director ti maysa a kompania.

Nagpatulong ti asawa ti biktima a ni Choi Kyung-jin, kada Duterte ken Dela Rosa ta kalpasan a nagbayad iti ransom a P5 million kadagiti kidnaper, ngem saan a nawayawayaan ti biktima. Nakidnap ti Koreano ken ti Pilipina a katulongda idi Oktobre 18, 2016 iti pagtaenganda sadiay Angeles City babaen kadagiti armado a lallaki a nagpabigbig a nangisayangkat iti Operation Tokhang. Sigud a nawayawayaan ti katulong ngem saanen a nakita ti Koreano uray nagbayad iti ransom ti asawana.

Impalgaken ti NBI a walo dagiti suspek iti kidnapping, pakairamanan dagiti tallo a polis. Simmukon iti NBI ni SPO3 Ricky Sta. Isabel, sigud a kameng ti PNP Anti-Illegal Drugs Group a maysa kadagiti suspek, ngem naglibakanna ti pammabasol kenkuana. Inrakurak pay ti NBI a natayen ti nakidnap a biktima babaen ti pannakabekkel, ken na-cremate ti bangkayna iti Greams Funeral Services a kukua met laeng ti retirado a polis ken agdama a kapitan ti barangay.

Marurod ni Dela Rosa iti pannakairaman dagiti polis iti krimen nga iti pay mismo uneg ti Camp Crame nga ayan ti PNP National Headquarters ti nakapapatayan ti biktima. Impettengna ti pannakainaig ni Sta. Isabel iti krimen. Inrakurakna nga adda nangato a retirado nga opisial ti PNP a protector ni Sta. Isabel, maysa kadagiti narco-general nga innaganan ni Duterte. Impakaammona pay nga adda grupo nga agpangpanggep a mangdadael iti kampania ti PNP kontra illegal a droga.

Nangipila iti resolusion sadiay Senado ni Senador Panfilo Lacson, Chairman ti Committee on Public Order and Dangerous Drugs, para ti pannakaimbestigar ti kaso nga inawaganna iti “Tokhang for Ransom.” Segun kenkuana, sakbay ti kaso ti nakidnap a Koreano, adda gayyemna a Filipino-Chinese a nabiktima met laeng iti kasdiay a modus operandi, ngem nawayawayaanen ta nagbayad ti pamiliana iti ransom. Dagiti suspek iti krimen ket nabigbigen ken naikkatdan iti puestoda ken madaman ti imbestigasion iti kaso. . Kas sigud a PNP Chief, dinillaw ni Lacson ti kinaginad ni Dela Rosa a nangaksion kadagiti polis a mairekreklamo iti kidnapping a rebbengna a nadaras koma a maipakat ti summary dismissal proceeding.

Mabalin a no saan a nagpatulong ti asawa ti Koreano kada Duterte ken Dela Rosa, ken saan a bimtak iti media ti kaso, ket saan pay a naaksionan ti krimen. Nakababain dagitoy a pasamak no agpayso nga adda dagiti kameng ti PNP a mangar-aramat iti Operation Tokhang kas wagas tapno makakidnap wenno mangikilda kadagiti biktima nangruna dagiti ganggannaet. No kastan ti mapaspasamak, sino koma pay ti talken ken pagkamangan dagiti umili? No agtultuloy a mabiktima dagiti ganggannaet nga agnanaed iti Pilipinas, ad-adda a madadael ti imahe ti Pilipinas iti imatang ti sangalubongan.

Naglataken ti Pilipinas gapu kadagiti pannakalabsing ti kalintegan ti tao bayat ti nainget a gerra ti gobierno kontra illegal a droga. Gapu iti Operation Tokhang, millionen dagiti simmuko a mapapati a drug users ken pushers. Sabali pay dagiti nasurok a 6,000 a napapatay gapu iti mapapati nga adda pakainaiganna iti illegal a droga. No pudno nga adda dagiti mangus-usar iti Operation Tokhang tapno makakidnap wenno makakikilda ket dakdakes manen ti panagkita dagiti taga-sabali a pagilian. Kasano a mapaksiar dagiti krimen no dagiti agar-aramid ti kriminalidad ket dagiti met laeng mismo nga agipatpatungpal ti linteg?

Ad-adu dagiti nasayaat a polis ngem dagiti dakes ken bulok a kameng ket palaadenna ti langa ti PNP. Dagiti mapaspasamak a panagabusar dagiti dadduma a polis ket gapu iti aglaplapusanan a suporta kadakuada ti Presidente ken Commander-In-Chief ta uray no nagbasol wenno nagbiddutda iti naglabas ket kankanunonganna latta ida. Sapay koma ta ti kaso dagiti polis a nainaig kadagiti panagkidnap ket saan a maipada kadagiti kameng ti PNP a nainaig kadagiti pammapatay manipud idi nangrugi ti agdama nga administrasion. (Eden A. Alviar)

 
Comments are closed.