Footer

PIESTA NI APO JESUS NAZARENO ITI QUIAPO

Salaysay ni Eden A. Alviar

(Maudi iti dua a paset)

Natibker ti debosion dagiti adu a mamati iti imahe ni Apo Nazareno. Ngem ania kadi ti pakasaritaan daytoy nga imahe ni Apo Jesus ta napalaus la unayen ti debosion dagiti adu a Katoliko a Pilipino?

Ti imahe ti nangisit nga Apo Nazareno ket naaramid iti natangken a kayo idi maikanem a Siglo babaen ti grupo dagiti Kastila nga Agustiniano Recoletos a praile sadiay Acapulco, Mexico. Naisangpet ti imahe iti Pilipinas idi 1606. Daydi Papa Inocensio X ket binigbigna ti grupo dagiti laygo a Confraternity of Santo Cristo Jesus Nazareno idi 1650 para ti pannakaitandudo ti debosion iti imahe. Kabayatan ti napaut a panawen iti panagturay dagiti Kastila iti Pilipinas, napawilan dagiti Pilipino nga agkameng iti Cofradía de Nuestro Santo Jesús Nazareno. Impaay met ni Papa Pio VII ti pamendisionna kadagiti deboto idi 1880, ken inyetnagna ti Plenaria Indulhensia wenno pannakapakawan ti basol dagiti napasnek nga agkararag ken Apo Nazareno. .

Immuna a nagtaeng ti imahe ni Apo Nazareno kadagiti nagduduma a simbaan sadiay Manila pakairamanan ti simbaan ni San Nicolas de Tolentino (iti ayan ti Rizal Park ita) sakbay a naibalay iti simbaan iti Quiapo idi 1787.

Nalatak ti imahe iti intero a Pilipinas ket patien dagiti adu a deboto a daytoy ket milagroso a babaen ti panangsagid laeng ket maagasan dagiti sakitda wenno mapatgan dagiti dawatda iti Dios. Ti pammati iti kinamilagroso ti imahe ti nangallukoy kadagiti umad-adu a deboto ken ni Apo Nazareno.

Mamitlo a daras a mairuar ti orihinal wenno duplikado nga imahe ni Apo Nazareno manipud iti simbaan iti Quiapo para iti panagdaydayaw ti publiko – iti Biernes Santo, Enero 1 nga umuna nga aldaw ti Nobena, ken iti sakbay ti kaaldawan ti piesta para iti Traslacion. Ti Traslacion iti piesta ket ibiagna ti pannakaiyakar ti imahe idi 1787 manipud iti orihinal a nagyananna iti disso ti Rizal Park agingga sadiay simbaan iti Quiapo.

Naipanagan iti imahe a Jesus Nazareno a nagbalin a nagan wenno titulo ni Apo Jesus kabayatan ti kaaddana sadiay Nazareth, Galilea. Ti kinapateg ti estatua kadagiti Katoliko a Pilipino ket maipakita iti kaadu dagiti deboto a makikaykaysa iti Traslacion kadagiti kalsada iti Manila kabayatan ti piesta iti Quiapo, ken dagiti rineprep a makimkimisa iti inaldaw iti simbaan ni Apo Nazareno nangruna iti Biernes.

Naidumduma a talaga ti debosion dagiti deboto ken ni Apo Nazareno sadiay Quiapo ta saanda nga ikankano ti rigat ken peggad tapno laeng makipasetda iti dayta a naindaklan a piesta ken matungpalda ti kari ken panatada. Adda dagiti mangibilang a ti wagas ti panagdaydayaw dagiti deboto iti Nangisit a Nazareno ket maibilang a panagan-anito wenno panagrukbab iti didiosen (idolatry). Ngem kadagiti deboto, ibilangda dayta a saan nga idolatry no di ketdi panangipaduyakyak ti nauneg a pammati ken panagtalekda iti Dios. Ipakita laeng daytoy ti rikna dagiti adu a Pilipino iti tarigagayda a mangpunas, mangsagid, mangagep wenno mangabrasa kadagiti sagrado a banag.

Naisangsangayan ti wagas ti debosion dagiti relihioso a Pilipino a mangipakita ti pammatida iti Dios kas Kristiano. Nagsayaat koman no dagiti kaaduan a Pilipino a Kristiano ket mayanninawda iti panagbiagda ti napudpudno a debosion ken ni Apo Nazareno babaen ti panangsurotda iti pammatuladna a saan a nagkitakit a nagbaklay ken natay iti krus gapu iti ayatna kadagiti tattao.#

Comments are closed.