Footer

Ti Agsingsingir

Sarita ni Rolando A. Seguro, Jr.

(Maudi a paset)

MAUDI a lawas ti bulan. Nairanrana a nagtrangkaso ni Kinio ket kapilitan a nag-file iti sick leave-na. Kapilitan met a ti superbisorna ti nagkolekta kadagiti centerna.

Komusta met ti center-yo, Manang?” sinaludsod ni Sir Gabby ken ni Manang Lita a center chief ti Buko Center. Kompleto ti bayadda ken adda met amin dagiti kameng ti center. Di ammo ni Sir Gabby ngem naiteks ni Kinio a ti superbisorna ti agrota isu a nagatendar amin dagiti kameng ti center. “Ken komusta met ni Kinio Kadakayo? Awan met la ti problemayo kenkuana?”

Nagkikinnita dagiti dadduma a kameng. Kasla adda kayatda nga ibaga ngem naunaan ni Manang Lita ida.

Ok met, Sir. Naurnos met ti centermi. Ken ok met ni Sir Kinio, Sir. Nasingpet ken naanus kadakami.”

Kasta man met laengen dagiti litaniada iti sumaruno a center a napanan ni Sir
Gabby.

Ngem iti aldaw nga iskediul a panagbayad ti Bountiful Center, nasdaaw ni Sir
Gabby ta ni laeng Manang Edna a center chief ti nadanonna iti center house-da idinto a nasurok a sangapuloda amin a kameng dayta a center. Idi damagenna no ayan dagiti kakaduana ken no ayanna ti pagbayadda, saanen a makatalna daytoy ket kasla makasangsangiten pay ti langanan.

Apay, Manang, adda kadi problema?” sinaludsod ni Sir Gabby. Adda nagparikna kenkuana.

Kua ngamin, Sir. Hmmp, diak koma kayat nga ibaga ta kababain,” lumabbagan ni Manang Edna.

Ket ibagam, a, Manang, tapno maammuak no ania ti parikut ti center-yo. Ken bareng makatulongak a mangsolbar no aniaman dayta a parikut,” kinuna ni Sir Gabby.

Kua, Sir. Adda ken ni Sir Kinio ti bayad dagiti dadduma a kakaduami,” inturtured nga imbaga ni Manang Edna. Tiptipdenna ti panagluasitna.

Nasdaaw ni Sir Gabby iti nangngegna. “Kasano nga adda ken ni Kinio, nagbayadda kanianan?” impalutpot latta ti superbisor. Nabayagen nga agat-atap nga adda kalokuan nga ar-aramiden ni Kinio ngem awan la ngamin ti pammaneknekna.

Haan, Sir. Ni koma sir Kinio ti agbayad ta nasublatna ngamin dagiti dadduma a deposit-mi. Dayta ngamin ti nagtutulaganmi idi, Sir. Alla, diak koma kayat nga ibaga, Sir, ta kababain ken ni Sir Kinio. Ngem awan met ngamin nairana a kuartami a pagbayadmi pay la koma.” Kasla nakirogen a pasayan ti rupa ni Manang Edna.

Ngem maiparit koma nga utangenna dagiti depositoyo, Manang,” nagsennaay ni Sir Gabby. “Apay, ania kano a gapu nga immutang kadakayo?”

Nagsakit kan diay kaanakanna, Sir. Mabainkami met, a, ta naganus met ni Sir Kinio Kadakami,” insungbat ni Manang Edna. “Alla, Sir, baka ikkatenyo ni Sir Kinio.”

Saan met ngata, Manang,” kinuna ti superbisor. “Addanto agimbestigar tapno maammuan no ania ti pudpudno a makagapu. For now, agyamanak unay iti impormasion nga intedyo. Namnamaenyo a risutenmi daytoy tapno ad-adda pay a makaipaaykami kadakayo iti napimpintas a serbisiomi.”

Idi makasangpet ni Sir Gabby iti opisina, dagus nga inreportna iti branch nanager ti naduktalanna. Inreport met a dagus ti branch manedier iti general manager. Tinton GM ti mang-advise iti Human Resource Department tapno imbestigarenda dayta a kaso.

Idi malaingan ken agreport ni Kinio iti sumuno a lawas, kinapatang a dagus ti HRD Head. Kinumbinsirna pay nga ibaga wenno aminenna lattan no adda pay dagiti sabali a kalokuan nga inaramidna tapno nalaglag-an kano ti pannusa a maited kenkuana. Ken tapno saan kanon a dumanon pay kadagiti board of directors. Ngem awan inamin ni Kinio malaksid iti inutangna a deposito dagiti klientena gapu ta nagipit.

Makabulan a mandatory leave without pay ti intedda ken ni Kinio kabayatan nga im-imbestigarenda ti kasona. Saan pay nga umawat iti meal ken load allowance-na iti uneg dayta a makabulan. Kanayon met ngarud a rengrengen ni Pauline iti load. Sa ni Cristine, sangkarengrengna met nga agdua-bulan kanon a saan a nagregla. Makadlawdan sa kano payen idiay balayda ket agipangpangta kano ni Tata Candro nga amana. Masapul a maipaikkatda ti sikog ni Cristine sakbay nga aglinasin tapno makaliklik iti pannakaigalutna iti babai a dina met kapkapnekan. Ngem saanen a kas idi nga adda magatang kadagiti botika nga agas a pagparegla. Adda madamdamagna a nalimed a mangngilut kano a nalaing nga agikkat iti sikog ngem lima ribu kano ti kababaan a bayadan iti daytoy.

Pinasiar dagiti kameng ti audit committee dagiti amin a center ken kliente ni Kinio ket naduktalanda dagiti adu a kalokuan nga inar-aramidna. Malaksid kadagiti saan a nairemit a koleksion a kaaduanna ti saanna a rinesibuan, dagiti naresibuan ngem agduma ti naisurat a gatad iti orihinal ken duplicate ti resibo, dagiti panagut-utangna kadagiti klientena, adda pay gayam nagpailak-amanna iti loan wenno tay aw-awaganda iti ride-on loan. Ti makadakes di met pulos mangmangted ti bayadna para iti inlak-amda nga inutangna.

Kalpasan a maileppas ti audit committee ti reportda, insubmitirda daytoy kadagiti BODs tapno pagpapatanganda iti board meeting a nangayabanda ken ni Kinio.

Ania, barok, agpaypayso met la dagiti reportda kontra kenka?” sinaludsod ti presidente ti kompania ken ni Kinio kalpasan nga imbasa ti corporate secretary ti report nga inaramid ti audit committee. “Aminem met la nga inaramidmo amin dagita?”

Wen, Sir,” nakapsut a sungbat ni Kinio.

Ket apay nga inaramidmo dagita? Dim kad ammo no ania ti dusa ti agaramid kadagita?” sinaludsod met ti maysa a direktor. Makaunget ti langa daytoy.

Ammok, sir.”

Ket apay ngarud nga inaramidmo? Ammom gayamen no ania ti pagbanagam no agaramidka iti kasta?” inyallawat ti maysa pay a direktor.

Nagipitak ngamin, Sir,” insungbat manen ni Kinio.

So, ania ngarud ti kayatmo nga ibaga ita, Mr. Rapas?” ti manen presidente.

I’m sorry, sirs. Ammok nga adu dagiti naaramidko a basol. Pakawanendak koma. No ikkandak pay iti maysa a gundaway, diakton uliten pay ti agaramid kadagita,” napnuan panagbabawi a kinuna ni Kinio. “Again, I’m sorry, sirs.”

Talaga a saanton a maulit pay dagita,” ti met independent director ti nagsao. “Adu unay dagiti naaramidmo a basol iti kompania ket narigatmin nga isubli ti panagtalekmi kenka. You know that no one is indispensable in this bank.”

Oh, gentlemen, please don’t be so sarcastic. Let me handle this,” inyallawat ti presidente ket sinangona ni Kinio. “Mr. Rapas, you know that we can’t let you stay. But we want you to have a graceful exit. We will let you file a resignation tapno maikkandaka iti clearance. In that way, mabalinmonto pay ti agaplay iti sabali a kompania. And hopefully saankanton nga agaramid iti kalokuan. Thank you for working with us, and… goodbye, Mr. Rapas.”

Ninamnaman ni Kinio dayta a sentensiana. Ngem kasla nagtupak latta ti langit kenkuana. Panagriknana ket nagrikep ti ruangan dagiti amin a namnamana idinto a naglukat met ti ruangan ti panagtutuokna.

Kasla maaw-awanan a naglugan iti van iti panagawidna. Kinautna ti selpon iti bolsana. Adda tallo a missed calls-na. Napuotanna itay ti panagkuyegyeg ti in-silent mode-na a selponna ngem gapu ta adda iti board room, dina inkaskaso dagitoy. Naggapuda gayam ken ni Cristine. Ibolsana koman ti naka-silent mode pay la a selponna ngem nagkuyegyeg manen daytoy. Ni manen Cristine. In-slide-na ti arrow iti screen ti selponna tapno sungbatanna ti tawag. Ag-hello koma pay laeng ngem addaytan a nagsao ni Cristine.

Bebz, dadtoyak balayyo. Pinagtalawnak ni Tatang ta naduktalannan a masikogak. Ipangpangtana a patayennaka kano no dinak itakder isu a simmangpetakon, a, ditoy balayyo ta diak met kayat a rummuar nga awan amana ti anakko.”

Di napupuotan ni Kinio a naibbatan ti selpon nga iggemna ket natnag daytoy iti basar ti van a naglugananna.

Ammona a pannusa amin dagitoy kenkuana. Agbabawi man ngem naladawen ti amin. Pinarana ti van. Dimsaag ket nagna nga awan masnop a turongenna.#

 
Comments are closed.