Footer

Balbala, kapsula, nasamsam iti search operation

STO. DOMINGO, Ilocos Sur – Awan ti paltog no di balbala a kaadduanna ti naiputoken ti nasukainan dagiti polis iti pagtaengan ti maysa nga agnaed iti Barangay Paguraper ditoy nga ili.

Ngem umdasen daytoy tapno makasuan ni Rodolfo Patubo y Cafugaoan, 56, ken residente iti nadakamat a barangay iti panaglabsing iti RA 10591 wenno iti Comprehensive Firearms and Ammunition Regulation Act.

Idi agsapa ti Pebrero 1, inwayat dagiti nagtipon a kameng ti CIDG Ilocos Sur, ISPPSC, PIB ken Sto. Domingo Police Station ti panagsukisok iti balay ni Patubo babaen ti bileg ti search warrant nga inyisio ni Judge Rapheil F. Alzate ti Regional Trial Court, Branch 24, Cabugao.

Iti nasao a panagsukisok, nakakumpiska dagiti polis iti uppat a bala para iti caliber M14; 5 a kapsula para cal. M14; 3 kapsula para caliber 30 (Carbine); maysa a kapsula para caliber 5.56; 2 kapsula para caliber 9MM; 3 magazine assembly para M14; ken maysa a magazine assembly para M16.

Naiwayat ti panagsukisok iti imatang da Barangay Kagawad Marso C. Tagudar ken Barangay Kagawad Mario T. Pablo.

Naipan ti suspek ken dagiti nakumpiska iti balayna iti Ilocos Sur CIDG Office, Camp Presidente Elpidio Quirino, Bulag, Bantay, Ilocos Sur para iti dokumentasion ken disposision.

Iti pannakaisurat daytoy, maisagsagana metten para iti inquest proceedings ti kaso a panaglabsing iti RA 10591 maikontra ken ni Patubo.#

Comments are closed.