Footer

Lugan a mangipuslit baboy, napasardeng iti checkpoint

TAGUDIN, Ilocos Sur – Maysa a lugan a nagkarga kadagiti baboy ti saan a pinalusposan dagiti agbambantay a sumrek iti probinsia iti quarantine checkpoint sadiay Barangay Bio ditoy nga ili idi agsapa ti Pebrero 2.

Iti report manipud iti polis ditoy, nakaawatda iti tawag iti selpon manipud ken ni Efren Cabida Ciubal, quarantine aide, a nakabase iti Tagudin Animal Quarantine Checkpoint, Barangay Bio a maysa a lugan ti nagpanggep a mangipuslit iti kargana a baboy iti probinsia.

Segun ken ni Ciubal, kaduana da Ruben Gandalera ken Goie Ledda a nangpasardeng iti checkpoint idi agarup 7:30 ti agsapa ti Pebrero 2 ti maysa a Mitsubishi FB L300 agsipud ta nakitada a nagkarga kadagiti baboy.

Ngem imbes nga agtungpal ti drayber nga idi agangay ket nabigbig a maysa nga Emeliano Malapanguie Apilan, 57, naasawaan, ken residente iti Lioac Sur, Naguilian, La Union, pinakaskasna ketdi ti lugan a nagpaamianan.

Kinamat da Ciubal ken kakaduana ti lugan agingga iti naipiskotda daytoy iti asideg ti Centrum Gasoline Station iti Barangay Lacong.

Naduktalanda a nagkarga ti L300 iti innem a baboy.

Malaksid ken ni Apilan, nakalugan iti L300 dagiti katulong a nainaganan Eugene Quinones Rillorta ken Rommel Fuselero Munar.

Idi biroken da Ciubal ti shipping permit kasta met ti veterinary health certificate ken accredited farm documents, awan ti naipakita ni Apilan.

Saan a napalubosan ni Malapanguie nga agbiahe agsipud awan ti naidatagna a shipping permit kasta met ti veterinary health certificate ken accredited breeder farm documents.#