Footer

Nangmasaker 4, nakasugatan maysa, napilaan iti kaso

SANTA, Ilocos Sur – Napilaan iti agsusukot a kaso ti maysa a dati a kameng ti Philippine Constabulary a nangmasaker kadagiti aggiinom nga aggagayyem iti uneg ti balay ti maysa a kagawad idi rabii ti Enero 31.

Naipaiman iti opisina ti provincial prosecutor ti kaso a four counts of murder, frustrated murder ken panaglabsing iti RA 10591 maikontra ken ni Antonio Espiritu y Masulet, 63, naasawaan, ken residente iti Barangay Rizal, Santa, Ilocos, Sur iti baet ti idadawat daytoy iti pammakawan kadagiti pamilia dagiti biktima a nairaman a nagudas iti inwayatna a pammaltog.

Uppat a tattao ti nagudas idinto a maysa ti nasugatan idi pinaratupot ida ni Espiritu bayat ti panagiinomda iti balay ni Barangay Kagawad Isidro de Peralta sadiay Barangay Basug ditoy nga ili idi rabii ti Enero 31.

Intaray dagiti nagresponde a polis iti Metro Vigan Cooperative Hospital, Bantay, Ilocos Sur da Reykhel Ballesca y De Peralta, 25, naasawaan; Fazel Custodia y Pimentel, 24, awanan asawa; Gerardo Belen y Margos, 48, agpapada a residente iti Brgy Basug, Santa, Ilocos Sur; ken Romulo Bruzon y Basa, 21, awanan asawa ken residente of Brgy Quezon District, Santa, Ilocos Sur, ngem naideklara dagitoy nga awanen ti biagda gapu dagiti sinagrapda a sugat.

Naitaray met Gabriela Silang General Hospital, Tamag, Vigan City ni Prince Marion Garcia y Basa, 26, awanan asawa, ken residente iti Brgy Magsaysay Dist, Santa, Ilocos Sur ket madama a maag-agasan iti nadakamat nga ospital.

Iti interbiona iti maysa a lokal a radio, nagpakawan ni Espiritu iti pamilia dagiti nairamraman a natay gapu ta nakainom ken saan a nasimbeng ti panunotna idi pinarutupotna dagiti biktima.

Inannugot ni Espiritu nga agsagsagaba iti war shock.

Kinuna pay ti suspek a nupay agbabawi iti napasamak, awanen ti maaramidna ta nalpasen.

Mapapati a dati a susik ti motibo ti pammaltog ket ni laeng De Peralta ti panggep ti suspek a paltogan.

Kinuna pay ni Espiritu a sakbay a pinaltoganna dagiti biktima, imballaagna a dida agkuti ngem mapapati nga adda naggaraw kadagiti biktima ket pinarutupotnan ida.

Ngem iti inisial a panagimbestiga dagiti polis, madama nga aggiinom dagiti biktima iti balay ni Barangay Kagawad Isidro de Peralta idi agarup 9:45 ti rabii ti nadakamat a petsa idi kellaat a nagparang ni Espiritu ket iti awan a rason, pinarutupotna ti bunggoy.

Mapapati a naglibas ti suspek kalpasan ti pammaltog ngem idi agangay, simmuko iti polis.

Narekobre dagiti polis ti paltog nga inaramat ti suspek iti balay ti maysa a John Pader y Palansigue, 52, awanan asawa, agpampanday, ken residente iti Sacuyya Norte, Santa, Ilocos Sur.

Nakarekobre met dagiti inbestigador iti 21 a kapsula manipud iti cal. 30, 3 a deformed a naiputok a bala ken 2 a metallic fragments iti nakapasamakan iti krimen. (Tawid News Team)