Footer

Negosiante a naabak sugal, nanguksot iti paltog

STA. MARIA, Ilocos Sur – Nasakit ti nakem daytoy a negosiante a maabak iti sugal ket bimmunot iti paltog. Resulta: nakasuan ti suspek iti daytoy nga inaramidna.

Segun iti report, napan nakiminatay sadiay Barangay Pacang, Sta. Maria, Ilocos Sur ni Jonel Cotillon y Gutierrez, 36, awanan asawa, negosiante, ken residente iti Barangay Lubong ket naabak iti kara y krus.

Mapapati a bimmunot ni Cotillon iti paltog ngem ginammatan da Barangay Captain Danilo Bitania ken dagiti tanod sada kinumpiska ti armasna a maysa a cal. 38 revolver a napunas ti serial numberna ken nagkarga iti uppat a bala.

Impaima da Bitania ti suspek kadagiti nagresponde a polis ket naipan daytoy agraman ti nakumpiska a paltogna iti police station para iti dokumentasion ken disposision.

Iti kaudian a report, naipilan ti kaso a panaglabsing iti RA 10591 maikontra ken ni Cotillon a naipababaen iti CC No. 4269-N.#