Footer

Paltog, balbala nakumpiska iti search operation

MAGSINGAL, Ilocos Sur – Paltog ken balbala ti nasukainan dagiti nagtitipon nga elemento ti kapolisan iti balay ti maysa nga agnaed iti Barangay Manzante ditoy nga ili idi Pebrero 8, 2017.

Positibo ti search operation nga insayangkat dagiti operatiba manipud iti CIDG Ilocos Sur, PPSC Ilocos Sur, PIB ken Magsingal police station nga indauluan ni Chief ISCIDG Provincial Officer Inspector Richard D. Palay,  ket nakakumpiskada iti paltog ken balbala iti balay ni James Pasion y Cortez, ti puntiriada a sukisoken, babaen ti bileg ti search warrant nga inyisio ni Judge Rapheil F. Alzate ti Regional Trial Court, Branch 24, Cabugao, Ilocos Sur.

Nakakumpiska dagiti operatiba iti maysa a Caliber 45 pistol (high capacity), Ranger nga addaan Serial No. WF-05-0450; 2 magazine assembly para caliber 45; 20 live ammunition para caliber 45; 2 bala para 12 gauge shotgun; 3 a bala para caliber M14; maysa a bala para Caliber 30 Garand; maysa a short magazine assembly para M16; maysa a long magazine assembly para M16; ken maysa nga inside holster para cal. 45.

Sinaksian dagiti barangay officials a pakaibilangan da Barangay Kagawad John D. Avelino ken Barangay Kagawad Angela M. Garcia ti pannakaiwayat ti panagsukisok.

Naipan ti suspek ken dagiti nakumpiska iti Ilocos Sur CIDG Office, Camp President Elpidio Quirino, Bulag, Bantay, Ilocos Sur para iti dokumentation ken disposision.

Maisagsaganan para inquest proceedings ti kaso a panaglabsing iti RA 10591 maikontra iti suspek.#

Comments are closed.