Footer

2 nagtakaw iti motorsiklo, imbuking ti CCTV

STA. CRUZ, Ilocos Sur – Babaen ti tulong ti footage manipud ti closed circuit television, nabigbig ken natuntonan dagiti polis dagiti nangtakaw iti dua a motorsiklo a naiparking iti sango ti simbaan ditoy nga ili tallo nga aldaw itan ti napalabas.

Naireport a naggiddan a natakaw manipud iti nakaiparkinganda  iti sango ti simbaan dagiti dua a Honda Timex a kukua ni Yolanda C. Somera, residente iti Barangay Farola, Tagudin, Ilocos Sur ken ni Villamor Aguilar, Jr., residente iti Barangay Baracbac, Tagudin, Ilocos Sur idi agarup 9:00 ti bigat ti Pebrero 5.

Segun iti report, imparking ti kabsat ni Villamor a ni Johnson Aguilar y Novida ken ti anak ni Yolanda a ni Jeremy Somera y Cabagbag, dagiti nasao a  motorsiklo iti sanguanan ti Tagudin Chrusada napan nakimisa.

Awanen dagiti motorsiklo idi aggawidda.

Idi rinebio dagiti polis ti footage ti CCTV a naipasdek iti likud ken sango ti Tagudin Municipal Hall, limtuad a dua a lalaki ti nangitaray kadagiti lugan.

Impatulod dagiti polis ti footage iti Facebook account ti police station para ti pannakabigbig dagiti nagtakaw.

Maysa a netizen ti nangiposte  nga am-ammona ti maysa kadagiti suspek.

Idi Pebrero 7, nangiwayat dagiti operatiba manipud ti Tagudin Police Station ken PHPT, Ilocos Sur iti follow-up operation, babaen ti koordinasion ti Balaoan Municipal Police Station ken Santol Municipal Police Station, a nagresulta iti pannakatiliw dagiti suspek a da Reynaldo Lorilla Jr. y Valdez, 32, awanan asawa, mannalon; ken ni Rogel Tuvera y Lamoste, 20, naasawaan, mannalon, iti mismo a balayda sadiay Barangay Patpata, Balaoan, La Union.

Iti panagpalutpot dagiti polis, impudno dagiti suspek nga insaldada dagiti motorsiklo ken ni Robert Camat y Tap-ayaw, 22, naasawaan, construction worker, ken residente iti Barangay Lettac, Santol, La Union; ken ni Mario Castillo y Sumabat, 56, naasawaan, mannalon, ken residente iti Barangay Cabua-an, Tagudin, Ilocos Sur.

Adda itan iti kustodia ti Tagudin police station dagiti dua a motorsiklo idinto a maisagsagana metten ti kaso maikontra kadagiti dua a suspek. (Tawid News Team)

 
Comments are closed.