Footer

10 simmuko a kameng ti NPA naikkan iti tulong pinansial

VIGAN CITY – Sangapulo a dati a miembro ti New People’s Army a simmuko iti Philippine Army a nakabase ditoy probinsia idi napan a tawen ti naikkan iti pinansial a tulong manipud iti Comprehensive Local Integration Program (CLIP) ni Presidente Rodrigo R. Duterte.

Kinuna ni Lt. Col. Eugenio Julio C Osias IV, kumander ti 81st Infantry Battalion a nakabase iti Santa Cruz, Ilocos Sur ken makinsakup kadagiti probinsia ti La Union, Ilocos Sur ken Ilocos Norte a da Ilocos Sur Governor Ryan Luis V. Singson ken ni Gen. Angelito M. de Leon, kumander ti 7th Infantry “Kaugnay” Division ti Philippine Army mismo ti nangiyawat iti tulong nga agdagup iti P807,000.00 iti simple a programa a naangay iti provincial capitol idi Pebrero 10.

Kinuna ni de Leon a programa ti nasional a gobierno ti CLIP a maipaay kadagiti rebelde nga NPA ken aktibo a suporter a kayatdan iti agsubli iti salinong to gobierno ken mangabaruanan iti natalna a panagbiag.

Innayon ni de Leon a pagrebbengan dagiti opisial ti gobierno ti mangisigurado ti nasayaat a pannakaited ti programa ti gobierno kadagiti maseknan nga umili.

Innayonna a daytoy ti maysa a kongkreto a pammaneknek ti nagkaykaysa a panagtitinnulong dagiti amin nga opisial ken ahensia ti gobierno a maseknan iti pannakaited ti programa ti gobierno kadagiti umili tapno magun-od ti naan-anay a panagdur-as ken kappia iti pagilian.

Kinunana pay a ti pannakaited ti tulong a pinansial kadagiti 10 a dati a rebelde ti mangipakita a napudno ti gobierno a mangisardeng iti gubat iti nagbaetan ti gobierno ken ti National Democratic Front – Communist Party of the Philippines – New People’s Army (NDF-CPP-NPA)

Iti laksid dagiti adu a karit, kasapulan nga ituloytayo ti panagtitinulong a mangted iti agnanayon a kappia, ken pudno a panagrang-ay iti lugartayo, babaen ti pannakaited kadagiti programa ken serbisio ti gobierno kadagiti umili,” inyunay-unay ni de Leon.

Biktima dagiti NPA iti saan a husto nga ideolohia, isu a kasapulan a silulukat a kanayon para kadakuada dagiti programa ti gobierno tapno magun-od ti husto a linak, talna ken panagdur-as iti pagilian,” kinuna met ni Osias.

Datayo a mangsalsaluad iti kappia ken panagdur-as ti pagilian ket masapul nga ipaaytayo ti napudno a pannakaited dagiti programa ken serbisio ti gobierno para kadagiti umili pakairamanan dagiti rebelde nga NPA,” kinuna met ni Col. Milfredo M. Melegrito, hepe ti 702nd Infantry Brigade ti Philippine Army. (Manipud iti report ni Imelda Castro-Rivero)

Comments are closed.