Footer

2 lalaki, nagudas iti nagsina a pammaltog

BANTAY, Ilocos Sur – Saan pay nga ammo no ania ti motibo iti pannakapapatay ti maysa a lalaki bayat nga ur-urayenna ti kalib-inna iti sango ti restaurant a pagtrabtrabahuan daytoy idi sardam ti Pebrero 15.

Napaltogan ni Efren Tabu y Tabbal, 34, ken residente iti Barangay Taguiporo, ditoy nga ili idi agarup 7:06 ti sardam ti nadakamat a petsa iti mismo a sanguanan ti Mira Hills restaurant a pagtrabahuan ti kalib-inna a ni Charissa Pastor ket nupay naitaray iti Metro Vigan Cooperative Hospital, saanen a naidanon a sibibiag iti nadakamat a balay-pagagasan.

Segun iti inisial a panagimbestiga dagiti polis, nakasakay ni Tabu iti motorsiklona a Euro bayat ti panagur-urayna ken ni Pastor idi nagsardeng iti sanguananna ti maysa a Yamaha Mio motorcycle a nagluganan ti suspek ket iti awan a rason, pinaltoganna ti biktima iti sumagmamano a beses a nagsagrapan daytoy kadagiti sugat iti nadumaduma a paset ti bagina.

Naglibas ti di nabigbig a suspek iti laud a direksion.

Mapapati a cal. 45 ti naaramat iti pammaltog kas maibasar iti narekobre ti SOCO team nga innem a kapsula manipud iti nasao a kalibre ti paltog, 3 nga slug ken maysa a bullet jacket iti crime scene.

Daytoy ti maikadua a shooting incident ditoy nga ili iti las-ud ti dua nga aldaw.

Idi parbangon ti Pebrero 13, napaltogan a puon ti ipapatayna ni Waldo Paroligan y Reotutar, 57, naasawaan, tricycle driver, ken residente iti Barangay San Jose, Vigan City.

Segun iti report, agdaldaliasat nga agpaabagatan ni Paroligan a nakasakay iti Kawasaki Bajaj Tricycle idi pinaltogan dagiti suspek a nagkalubbon iti Yamaha Mio motorcycle a nagsagrapanna kadagiti sugat iti nadumaduma a paset ti bagina.

Mapapati a sinurot dagiti di nabigbig a suspek ni Paroligan sada insayangkat ti pammaltog iti Rizal Street, Zone 6, Bantay, Ilocos Sur.

Naitaray ni Paroligan iti Metro Vigan Cooperative Hospital ngem indeklara ti doktor a nangtaming kenkuana a dead on arrival.

Naglibas dagiti di nabigbig a suspek iti abagatan a direksion.

Kalibre 45 ti mapapati a naaramat iti pammaltog kas maibatan iti narekobre ti SOCO Tean a kapsula iti nakapasamakan ti krimen. (Tawid News Team)

Comments are closed.