Footer

BANNER: 2 natay, 9 nadundunor iti nagsina aksidente ti lugan iti Aldaw dagiti Puso

CANDON CITY – Imbes nga aldaw ti panagragsak, nagbalin ti Aldaw ti Puso a malas iti sangapulo ket maysa a tattao agsipud ta nainbolbarda iti nagsina nga aksidente a napasamak ditoy siudad ken iti ili ti Narvacan.

Iti report manipud iti estasion ti polis ditoy siudad, nainbolbar ti maysa a Toyota Innova iti aksidente a nakatayan ti maysa nga ubing a pasahero ken nakaiyospitalan ti pito pay a tattao iti national highway a sakup ti Barangay Langlangca 2nd idi agarup 3:00 ti malem ti Pebrero 14 .

Nainaganan ti natay a ni Simon Manglio y Enriquez, 6, idinto a nabigbig dagiti nadunor a da Alipio Cruz Jr. y Marcial, 48, naasawaan, OFW manipud iti United Arab Emirates; Shirley Manglio y Enriquez, 50, naasawaan; Christian Vincent Retamar y Valdez, 32, naasawaan; Sheryl Retamar y Manglio, 29, naasawaan; Gloria Balanon y Burga, 48; Josaiah Balanon y Burga, 11; ken ni Athena Heilley Retamar y Manglio, agtawen iti maysa ken pito a bulan; residenteda amin iti Room St. Martin Compound, Balagtas (BIGAA) Bulacan.

Segun ken ni Retamar, napaspas ti taray ti luganda a Toyota Innova a minaneho ti OFW a ni Cruz nga agpaamianan idi adda nanalbuong ket napukaw ni Cruz ti kontrolna iti manibela a puon ti pannakadungpar ti lugan ti maysa a mangga iti akinlaud nga abaga ti kalsada.

Nagtuloy ti lugan a naguyas iti tengnga ti kalsada sa nagsardeng a simmango iti abagatan a daya a direksion.

Naipit ni Cruz iti manibela ken nasugsugatan dagiti kakaduana.

Naitaray dagiti biktima iti Candon General Hospital ngem pimmusay ni Manglo bayat ti pannakatamingna.

Nakaro ti dadael ti sungo ti lugan.

Kabayatanna, natay ti drayber ti motorsiklo gapu iti panangdungpar kenkuana ti maysa a van idi naikras iti kalsada kalpasan a nakadungpar iti dua a tao iti national highway a sakup ti Barangan San Antonio, Narvacan idi agarup 9:45 ti rabii ti Pebrero 14.

Saanen a naidanon a sibibiag iti Ilocos Sur District Hospital ni Jansen Zamora, residente iti Barangay Poblacion, Sta. Maria, Ilocos Sur.

Naitaray met iti nadakamat nga ospital para iti pannakaagasda da Reynaldo Marzan y Mina, 55, naasawaan, ken Danilo Galiste, 53, naasawaan, agpada a construction worker ken residenteda iti Tubao, La Union.

Iti inisial a panagimbestiga dagiti polis, agpaamianan a direksion ti Honda TMX a minaneho ni Zamora idi aksidente a dinungparna da Marzan ken Galiste a magmagna iti abaga ti kalsada iti daydi nga oras.

Gapu iti daytoy, naikras ti lugan ni Zamora iti kalsada.

Segun iti report, pinilidan ti maysa a delivery van nga agpaamianan ni Zamora a nagsagrapanna kadagiti grabe a sugatna ket nupay naitaray iti ospital ket naideklara nga awanen ti biagna.

Mapapati a saan a sinardengan ni Servellano Ansay Jr y Queciban, 47, naasawaan, drayber ti delivery van, ken residente iti Phase 1 B- Affoval Fort Bonifacio ti biktima ngem saan a nakalusot iti checkpoint nga impasdek ti polis-Bantay.

Ngem pinaglibakan ni Ansay a nainbolbar ti van iti nasao nga aksidente.

Iti pannakaisurat daytoy, naipaiman ti suspek iti kapolisan ti Narvacan. (Tawid News Team)