Footer

Mare, Kastoy ti Aramidem…

SINURSURAN: Kolum ni Jobert M. Pacnis

(Maudi a paset)

Tapno maliklikan ti panagtinnag iti sabali a rikna, saan nga ipalubos nga agbalin unay a nasinged ti asawa kadagiti gagayyemmo. Addan dagiti ammotayo a narakrak a pamilia gapu kadaytoy a pasamak. No saan a maliklikan a kasta, masapul ti panagsiput wenno panangrikna iti mapaspasamak.

Mabalin nga adu pay laeng ti masao ti pamiliam, wenno gagayyemmo iti asawam ta nalabit saanda a kursonada daytoy a para kenka. Ngem saan koma a daytoy ti mamaglamiis iti ayatmo kenkuana. Inasawam ta isu ti ipitpitik ti pusom. Sika ti makidenna; saan nga isuda. Ngarud, sika ti pudpudno a makaammo iti amin. Saanmo a dengdenggen ti ibagbagada a panangupay wenno pammadpadakes.

Money is the root of all evil, kunada itay. Ngem saan nga iti amin a gundaway. Dimo koma isadag ti panagayatmo iti asawam iti aspeto ti namaterialan a banag kas iti kuarta. No dumteng man a nangatngato ti sueldom ngem isuna, saan a daytoy ti pamkuatam a mangtagibassit kenkuana. Agbinnuligkayo ketdi iti pannakaitan-ay ti binangonyo a pamilia.

Ti lalaki, kasapulanna unay ti panangilala, ti pangibagaanna iti sasainnekna, iti kaririknana, iti padpadasna, ken iti amin-aminna. Rebbengna ngarud nga adda panawen a dumngeg kenkuana. Agbalin a good listener. Patibkeren ti komunikasion iti nagbaetan. Ti kinaawan ti nasayaat a komunikasion iti nagbaetan ti agassawa, saan nga adayo a rakrakenna ti pagtaengan.

No nasaysayaat wenno naim-imbag ti ideyam wenno kapanunotam, saan koma nga ipangas pay kenkuana. Patas koma ti magna. Agkammayet ketdi a mangbukel iti nasaysayud a pamuspusan tapno maidur-as ti bukod a pamilia.

Kagura la unay ti lalaki ti managimon nga asawa. No awan ti natibker a pammaneknek, saan a basta lattan sumanao. Narigaten no daytoy pay ti rason a paypaysuenna ti atapmo. Panagtalek iti tunggal maysa, dayta ti tulbek.

Aggaggaget. Makadismaya iti maysa a lalaki ti babai (kasta met iti kasunganina) a dina man la ammo ti agtrabaho kadagiti obra iti uneg ti pagtaengan. Ngem no nagaget, saan a di maalian ket aggaget met para iti masakbayan ti sibubukel a pamilia.

The best way through a man’s heart is through his stomach, kunada. Masapul ngarud nga ammom ti agluto iti saramsam a paborito ti asawam.

Liklikam ti agbalin a demanding. Kitaen met ti kaririknana. No ania ti makunana. Saan a sika laeng ti mapaturay iti uneg ti balay. Nasaon, masapul nga adda panagpapatas. Panagtitinnulong.

Akmen uray dagiti ipagarup a babassit a banag. Kas pangarigan, ti panangsabat kenkuana no aggapu iti pagtrabahuanna. Ti simple a panangkomusta iti naggapuanna, dakkelen a banag dayta. Ipamatmatna ti dungngom kenkuana. Uray laeng ti panangiyawat kenkuana iti danum no kasta a kassangpetna. Wenno ti panangikkat iti sapatosna ket iluten ti napakil a bagi wenno ulona.

Saanna met a rebbeng ti makiinnassideg kadagiti babbai a dakes wenno di maitutop ti paniriganna maipanggep iti kallaysa wenno panagassawa. Mabalin a masabidongan laeng ti utek nga agtinnag a pagsubangan iti pamilia iti masanguanan.

Ipakitam nga ay-ayatem dagiti annakyo. Sagut ida ti Dios a maspaul a taripatuen. No saan a marikna ti asawam nga ipatpategmo dagitoy, sigurado a bumaba a bumaba ti panagkita/ayatna kenka.

Awan iti edad ti panangipakita iti impluensia ken panagayat iti uneg ti pagtaengan. Saan koma ngarud a makerrasan ti panagayat nga ipapaay iti tunggal kameng ti pamilia.

Ikarkararagan ti pamilia. Kiddawen iti Namarsua a kanayonna koma a bayabayen ti pamiliayo wenno ti asawam tapno agtalinaed nga adayo daytoy iti pakaisagmakan.

No maaramid, uray dagiti simple laeng kadagiti naidasar iti ngato, awan sabali a pagturonganna no di ti naragsak a panagdenna ti agassawa.

Saan koman nga urayen a mapasamak ti maysa nga ang-angaw:

Anak: Kasano met a nagam-ammokayo ken ni tatang, ‘nang?

Ina: Diak man ammo anakko, kellaat adda lattan iti biagko. Idi agbalawak, agayatakon kenkuana. Siguro, pinananak ni Kupido.

Anak: Nagswit metten ti love life-yo, nanang…

Ina (napasennaay): Panaen koma manen ni Kupido ti amam… saan nga iti pusona no di ket iti ulona!

Naragsak nga Aldaw Dagiti Puso kadatayo amin!

Comments are closed.