Footer

NATIBKER A PAGPANGALAN

Sarita ni Jose Edwin S. Sajonia

(MAUDI A PASET)

Kasla mabriat ti barukongko a rimmuar iti opisinana. Rimmuarak iti kampus. Yantangay awanen ti klasek, agawidakon idiay Barangay Lacuben ta panunotek a nalaing ti aramidek.

Inyumanko ti parikutko ken ni Tatang.

Saanka la koma a nagpangpangulon, Barok no dimo maitakderan ti kalinteganyo nga estudiante. No maammuan ni manongmo ti paspasarem, madadael ti ganasna a mangtulong kenka. Laglagipem, masiribka ket saan la koma a dayta ti gapu a matungday dagiti arapaaptayo. Ita pay ta dandanikan makalpas.”

Inangaymi ti emergency meeting ti SSG babaen ti pammalubos ti Campus Dean. Nagyankami iti Student Center tapno saan a naparangarang a kas idiay Convention Center a dati a pagmimitinganmi.

Immuna iti agenda ti kiddaw ni Dr. Barmando. Ngem nagmosion ni Jenwar a mayud-udi ket umuna ti pannakaisubli dagiti dianitor tapno adda agdalus ken mapaaprobaran ti bigat-malem a panagrekurida ti school bus iti barbarangay tapno matulongan dagiti adayo ti pagindeganna nga estudiante.

Naaprobaran dagitoy dua ket nayaramidan ti resolusion a maipasa iti University President ken maikkan met ti kopia ti Campus Dean a pakaammuanna kabayatan a maaprobaran.

Iti pannakatratar ti kalikagum ni Dr. Barmando, nabingay dagiti estudiante. Ad-adu dagiti saan nga immanamong babaen ti panangidaulo da Ericzon, Jenwar ken Mikaela Joy. Indagasko iti opisina ni Dr. Barmando ti resolusion idi ma-adjourn ti miting.

“Shit! Awan serbina no adu ti komontra. Dapat, dakayo amin,” binittatayna ti papel nga insubli kaniak.

“Kas nakunak, no ania ti kayat dagiti estudiante, isu ti masurot, Sir,” impainayadko.

Kas napagnanamingan, napirmaaan ti dua a naaprobaran a resolusion sa naipaw-it idiay Main Campus ti Unibersidad. Iggemko pay laeng ti resolusion ni Dr. Barmando. Kinasaritak da Ericzon, Jenwar ken Mikaela Joy ngem natangken ti desisionda. Uray kano no dayta ti pakaigapuan ti dida pakaturposan.

Kabigatanna, nasdaawak ta agkaraiwara ti papel ken nagukisan ti kendi iti arubayan ti kampus. Kasla awan ti nagdalus. Simrekak iti masungad a CR iti CAS Building, naangot ti pagisbuan! Awan ti naurnong a danum!

We are under protest, Jeff. Nagtutulaganmi nga awan ti agdalus. Sori ta didakan napakaammuan. Agtigtignay ita ti Task Force Info-Drive-tayo iti intero a kampus. Mapunnuan ta mapunnuan!” impasabat ni Ericzon idi mapanak iti Library.

Impadamagna pay a madama pay nga ag-loblobby dagiti barangay students idiay opisina ti Campus Dean. Kaargumentoda ni Dr. Barmondo. Ikalintegan kano ti Doktor nga agek-ekonomia ti Campus isu nga iti laeng masakupan ti Poblasion ken asideg a barangay ti maserbisiuan ti School Bus.

Nalagipko ti imbaga ni Tatang. Addaakon iti maikapat a tawen ti Bachelor of Arts, Major in History. Planok ti mangala ti abogasia kalpasanna. Ket mapampanunotko ti aglusulos ti takemko iti kampus. Ngem ania ti rupak kadagiti kaeskuelaak? Maysa a kinatakrot no aramidek. Nagkararagak tapno tumalna ti nakemko ken maigiyanak.

Makalawas laengen sakbay a maammuan ti mangsukat ken ni Dr. Sagumaymay a Campus Dean. Nagaplikar met ni Dr. Precedita Ilanlan. Duada ken Dr. Erico Barmondo ti potensial nga agsalisal. Dandani agkatimbang ti kredensialda.

Pinaayabannak ni Dr. Barmondo ngem diak impirit. Nageksamennak met ketdi iti amin a subject-ko kenkuana ngem diak mangnamnama no paruarennak ta essay-type amin. Mabalinna a lastikuen ti puntos a maalak.

Saan laengen nga aglobby ti ar-aramiden dagiti estudiante. Inyumanda kaniak ti planoda nga agboykot iti klaseda ken mapanda agrali idiay Highway ken Poblasion sada agsubli iti Campus.

You, Mr. Septembrina, can not control your fellow students. Better resign and delegate your responsibilities to your next in rank!” binannikesannak ni Dr. Barmando iti panagranami idiay canteen.

Napunnuanen dagiti estudiante, sir,” kinunak.

Napaayabanak iti opisina ti Campus Dean. Diak ninamnama a nagdadarison a simmaruno dagiti kaduak nga student leaders. Pinagkalmak ida.

I beg of your restraint,” kinuna ni Campus Dean Sagumaymay. “Let’s resolve this peacefully.”

Mr. Septembrinas is abetting the students to go against the administration!” inwitwit ni Dr. Barmando.

Sungbatak koma ngem pinalugodak dagiti kaduak a lider a nangipalawag no apay a nag-lobby ken nagprotestada. Impettengda a mapasamak ti “student disobedience” no di maaksionan daras ti kalikagumda.

NADANON ti pannakaiyam-ammo ti baro a Campus Dean ti Pacific Valley State University, Cagan-ayan Campus. Naaramat ti Convention Center a naguummongan ti amin nga estudiante ti kolehio ken haiskul agraman dagiti propesor ken mangisursuro.

Nadamagmi a ni Dr. Precedita Ilanlan ti napagbutosan ti Board of Regents a baro a Campus Dean. Umay ita ni Dr. Agapito Purazzo, University President ken kakaduana nga opisiales tapno umayda iproklama ni Dr. Ilanlan. Itay pay nga ur-urayenmi ti bunggoy ti Presidente. Maipatpatayab met ti musika iti karaoke a pagur-urayan.

Pagammuan, simmungad ti tallo a nagsasaruno a van ken maysa a Pajero iti gate. Naklaatak ta ni met Dr. Barmondo ti dimsaag iti maysa a van ket inaklilianna ti Vice President for Student Affairs.

We come here to proclaim a new Campus Dean and Assistant Campus Dean in the person of Dr. Ilanlan and Dr. Barmondo respectively!” impakaammo ti Presidente. Nagsisipat dagiti mangisursuro.

Mayat ti rungiit ni Dr. Barmondo a napan iti stage. “Forgive me, my colleagues and student-friends. Dakayo ti natibker a pagpangalak ket gapu ta siak ti nadutokan a maikadua a panguloyo, maragsakanak ket ipagpagapuk man nga agtitinnulongtayo. Inrekomendak a maisubli dagiti dianitor ken mapatgan ti kalikagumyo a biahe ti school bustayo. Inaprubaran ni Apo Presidente dagitoy iti napasamak a komperensiami idiay Main Campus idi malem-kalman.”

Nagdir-i dagiti estudiante.

Mabuhay din si Jeff! Mabuhay tayong lahat!”kinuna ni Ericzon, Jenwar ken Mikaela Joy sada ingngato ti imak.

Kimmaway ni Dr. Barmondo iti stage. Imbalesko ti napatakder a tanganko. Nabaw-asanen ti barukongko.#