Footer

Negosiante, naaresto gapu iti indiscriminate firing

NARVACAN, Ilocos Sur – Aggagatel la ketdi ti ramay daytoy a negosiante isu a bayat ti kaaddana iti talonna sadiay Sitio Agcabatu, Barangay Ambulogan ditoy nga ili, nagpaputok iti paltog uray saan a maikanatad, ken awan makagapu idi agarup alas dose ti bigat ti Pebrero 15.

Kalpasan a nakaawat ti kapolisan ditoy iti tawag ti telepono manipud iti maysa nga agnaed iti nadakamat a barangay, nagrespondeda a dagus ket inarestoda ni Jayson Cacal y Burgos, 33, naasawaan, negosiante, ken kinumpiskada ti ikut daytoy a caliber 22 Magnum LPRFL, Armscor nga addaan iti scope ken bipod, serial number a 1346563, maysa a magazine, 9 a bala, 8 a naiputok a kapsula ken maysa a drone.

Iti panagimbestiga dagiti polis, bayat ti kaadda ni Cacal iti talonna, pinaputokna ti paltogna iti sumagmamano a daras a nakaigapuan ti panagbuteng dagiti kalugaran ti suspek.

Iti pannakaisurat daytoy, napilaanen ni Cacal iti korte iti illegal possession of firearm babaen ti inquest proceeding a nai-docket iti babaen ti Criminal Case No. 5447-N.

Temporario a nawayawayaan ti akusado kalpasan a nagpiansa.

Kabayatanna, inaresto dagiti polis ti maysa a lumugar iti Barangay Sta. Cruz, Sto. Domingo, babaen ti bileg ti warrant of arrest nga inyisio ni Acting Presiding Judge Corpuz B. Alzate ti Regional Trial Court, Branch 21, Vigan City idi malem ti Pebrero 16.

Akusado ni Francisco Alba y Alba, 39, naasawaan, iti panaglabsing iti Section 28 ti RA 10591 a naipababaen iti Criminal Case No. 8144-V 2017 ket rekomendado nga agpiansa iti P80,000.00.

Nakalista ni Alba a Top 1 Most Wanted Person (Municipal Level) ti Sto. Domingo, Ilocos Sur.

Naipan ni Alba iti police station para iti dokumentasion ken disposision. (Tawid News Team)