Footer

Negosiante, natakawan iti paltog

CANDON CITY – No saan a naggawid ti misis daytoy biktima, di koma nasukalan a tinakaw ti trabahadorna ti paltogna.

Nagreport iti polis ni Rexon Valdez y Acutan, 46, naasawaan, ken residente iti Barangay Allangigan 1st ditoy siudad, a tinakaw ti maysa a Nestor Galcon, Jr., 17, awanan asawa, kalugaranna, ti paltogna a Cal. 45 Norinco ket mapapati nga inwayatna daytoy idi Pebrero 9.

Iti dayta nga aldaw, naggawid ni Bella, asawa ni Valdez, maestra, ket nadatnanna ni Galcon iti uneg ti balayda.

Nagsuspetsa ni Bella ket tinawaganna ti lakayna no binaon daytoy ti suspek a mangala iti maysa nga enbelop iti uneg ti balayda.

Naggawid ni Valdez ket ditoy a naduktalan a mapukpukaw ti paltogna.

Mapapati nga insalda ni Galcon ti paltog ti amona.#