Footer

Rice dealer, biktima ti panangallilaw

STA. LUCIA, Ilocos Sur – Iti baet ti masansan a panagballaag dagiti polis, adda latta dagiti mabiktima iti panangallilaw, kas ti napasamak iti Barangay San Juan ditoy nga ili idi bigat ti Pebrero 16.

Nainaganan ti biktima a ni Teresa Habon y Chan, 53, naasawaan, negosiante, ken residente iti Barangay Conconig East, ditoy nga ili.

Kas maibatay iti report a dimmanon iti polis ditoy, idi agarup 8:00 ti nadakamat a petsa, bayat ti kaadda ni Habon iti Hadloc Rice Mill a kukua ken imatmatonanna, simrek ti maysa a babai ket imbagana a maysa a rice dealer sa nagsaludsod no mano ti agdama a presio ti tagilako a bagas ta adda 200 a sako ti bagas a kayatna nga ilako no agkaayatanda iti presio.

Kinuna ti babai a naikamada dagiti sinako a bagas iti barangay hall ti Catayagan, Sta. Lucia.

Naallukoy ni Habon a nangibaon iti drayberna ni Elpidio Chan y Fabro, 47, naasawaan, a mangkuyog iti babai tapno kitaenna no nasayaat ti klasena ti nasao a bagas a naikamada iti nadakamat a barangay hall.

Ngem idi makadanonda iti sango ti Sta. Lucia Municipal Hall, dimsaag ti suspek ket imbagana a kapatangna ti mayor sa dimmawat iti pauna a bayad ti bagasna.

Kalpasan a nangted ni Chan iti P100,000.00 kas partial payment, imbaga ti babai nga umunan iti Barangay Catayagan para iti pannakabunag dagiti bagas.

Idi makadanon ni Chan iti barangay hall, naduktalanna nga awan dagiti sinaksako a bagas isu a dagus a nagsubli ngem dinan nasapulan pay ti suspek.

Agtultuloy ti inbestigasion mainaig iti nasao a panangallilaw. (Tawid News Team)

Comments are closed.