Footer

Agkolkolekta iti pusta, natiliw iti anti-illegal gambling operation

SINAIT, Ilocos Sur – Kas panagtungpal iti pammilin ti Presidente a pannakaiwayat ti all-out war maikontra iti amin a klase ti sugal, nangisayangkat ti nagtitipon nga elemento ti kapolisan iti anti-illegal gambling operation sadiay Barangay Namnama ditoy nga ili a nagtungpal iti pannakatiliw ti maysa a agpappapusta idi malem ti Pebrero 21.

Inaresto ti nagtitipon nga elemento ti CIDG Ilocos Sur, Sinait police station, PIB ken ISPPSC ni Romeo Agsalog y Ines, 59, naasawaan, residente iti Barangay Ricudo, Sinait, kalpasan a natiliwan iti akto a panagawatna iti pusta nga aramatna ti papelitos manipud iti Small Town Lottery ngem awan ti maipakitana a dokumento a nangted iti otoridad nga agkolekta iti pusta.

Segun iti report, nakataray ti maysa a lalaki a pimmusta idi naangotanna ti kaadda dagiti polis.

Kinuna ni Agsalog nga iti Small Town Lottery (STL) sadiay Badoc, Ilocos Norte ti pangiremitanna kadagiti nakolektana a pusta.

Naipan ni Agsalog ken dagiti nakumpiska kenkuana iti Ilocos Sur CIDG Office iti Camp President Elpidio Quirino Bulag, Bantay, Ilocos Sur para iti umisu a disposision ken dokumentasion.

Iti kaudian a report, idi Pebrero 22, naipila ti kaso a panaglabsing iti PD 1502 kas inamendar ti RA 9287 maikontra ken ni Agsalog iti Regional Trial Court, Branch 24, Cabugao, Ilocos Sur ket nai-docket iti babaen ti Criminal Case No. 3585-K.

Nairekomenda nga agpiansa ni Agsalog iti P20,000.00 para iti temporario a wayawayana.

Maipalagip a pinirmaan itay nabiit ni Presidente Rodrigo Roa Duterte ti Executive Order No. 13 a nangibilinanna iti Philippine National Police iti panangpugipogna iti amin a klase ti illegal a sugal.

Tardiet a pugipogen ti PNP ti amin a klase ti sugal iti las-ud iti innem a bulan. (Tawid News Team)

Comments are closed.