Footer

BANNER NEWS: Crime volume iti Siudad ti Vigan, bimmaba idi 2016: PNP report

VIGAN CITY – Bimmaba ti bilang dagiti naisayangkat a krimen ditoy siudad idi 2016 no maidilig idi 2015, daytoy ti inreport ti deputy chief of police itay nabiit.

Iti naangay a miting ti City Peace and Order Council ken City Anti-Drug Abuse Council, inreport ni Police Chief Inspector Edgardo Medrano, deputy chief of police iti Vigan, a bimmaba ti bilang ti napasamak a krimen ditoy siudad manipud idi Enero agingga idi Disiembre 2016 no maidilig iti isu met la a period idi 2015.

Kinuna ni Medrano nga iti kadagupan a 978 a krimen a naireport iti Siudad ti Vigan manipud idi Enero agingga iti Disiembre 2015, bimmaba iti 11.75 per cent itay napan a tawen agsipud ta adda laeng napasamak a 863 a krimen.

Kas maibatay iti report, iti kadagupan a crime volume a napasamak idi napan a tawen, 140 kadagitoy ti index crimes ken 723 ti non-index crimes.

Agtinnag iti index crimes dagiti krimen a pakaibilangan ti rape, physical injury, murder ken homisidio ken dagiti sabali pay a krimen kas iti theft, robbery, carnapping ken cattle rustling.

Maibilang met a non-index crimes dagiti aksidente iti trapiko a pakainbolbaran dagiti lugan, ken dagiti panaglabsing iti Revised Penal Code ken Special Laws.

Kinuna ni Medrano nga idi napan a tawen, adda laeng nairekord a 211 index crimes ket bimmaba iti 68.95 per cent idinto a ngimmato ti non-index crimes iti 12.86 per cent agsipud ta adda nairekord a 93 nga insidente maigapu kadagiti aksidente ti trapiko a nakainbolbaran dagiti lugan.

Kas maibatay iti report ni Medrano, manipud idi nayimplementar ti Project Double Barrel manipud iti Hulio 1 agingga iti Disiembre 31, 2016, agdagup iti 14 drug personalities ti inarestar ti Vigan City police ken nakakumpiskada iti shabu nga agbalor iti P164,127.38 babaen dagiti inwayatda nga anti-illegal drugs operations.

Inreport pay ni Medrano nga iti kadagupan a 39 barangays iti Siudad ti Vigan, naideklararen a nadalusen iti illegal a droga dagiti 28 a barangay.

Kanaig daytoy, inwaragawag ni Medrano nga naing-inget nga ituon ti kapolisan ti imatangna iti panangpugipog iti amin a kita ti sugal iti pagilian kas panagtungpal iti Executive Order No. 13 a pinirmaan ni Presidente Rodrigo R. Duterte itay nabiit.

Kas maibatay iti nasao nga EO, nabilin ti PNP, National Bureau of Investigation, Department of Justice, Department of Interior and Local Government, ken ti Department of Information and Communications Technology nga agtitinnulongda a mangipatungpal iti napingpinget a kampania maikontra iti illegal a sugal idinto a naipabaklay iti Philippine Drug Enforcement Agency (PDEA) ti pannakapugipog iti illegal a droga ken dagiti dealers.

Kinuna ni Medrano a bimmaba ti crime rate iti Vigan city kas resulta ti nagtitipon a panagkikinnammayet ti kapolisan, dagiti sabali pay a law enforcement agencies, ti lokal a gobierno ken ti komunidad ditoy. (Tawid News Team/Manipud iti report ni April M. Montes, PIA 1)