Footer

Drug surrenderer, napaltogan

SINAIT, Ilocos Sur – Adda pakainaigan iti droga ti pannakapaltog ti maysa a negosiante iti uneg ti tiendana idi malem ti Pebrero 21?

Daytoy ti anggulo a kitkitaen dagiti inbestigador ditoy nga ili kalpasan a naammuan a maysa a drug surrenderer ti napaltogan a ni William Arthur y Savellano, 46, naasawaan, negosiante nga agnaed iti Barangay Pug-os, Sinait, Ilocos Sur.

Pinaltogan ti maysa kadagiti dua a di nabigbig a suspek a nagpammarang a kustomer ni Arthur bayat ti panagbuya daytoy iti telebision iti uneg ti tiendana, kaduana ti maysa a John Mark Tinaza y Sayo, 8, Grade 3.

Immuna a naitaray ni Arthur ni Suero General Hospital, Cabugao, Ilocos Sur sa naiyalis iti Metro Vigan Cooperative Hospital gapu kadagiti sinagrapna a dunor iti nadumaduma a paset ti bagina.

Apaman a naawatda ti tawag iti selpon mainaig iti pammaltog, dagus a nagresponde dagiti polis ditoy iti panangidaulo ni OIC Chief Inspector Reynaldo C. Mendoza ngem nakalibasen dagiti suspek.

Nangipatulod dagiti polis iti flash alarm kadagiti kabangibangna a police station ngem negatibo ti resultana.

Nakarekobre dagiti inbestigador iti crime scene iti dua a kapsula a mapapati a nagtaud iti cal. 45.

Agtultuloy ti panagimbestiga dagiti polis mainaig iti nasao a pammaltog.

Kabayatanna, ar-arisiten ti polis-Bantay no adda natalged a pagbatayan ti statement ti kabsat ti biktima ti pammaltog iti sanguanan ti Mira Hills Resto Bar idi sardam ti Pebrero 15.

Pinaltogan ti maysa a naglugan iti motorsiklo ni Efren Tabu y Tabbal bayat ti pananguray ti biktima iti kalib-inna a ni Charissa Pastor nga agpapaay iti nasao a resto bar.

Ngem iti statement ni Benedicto Tabu, mapapati a nadakamat ti kabsatna idi bimmisita kadakuada iti taengda idiay Barangay Laoingen, Sto. Domingo a no adda mapasamak kenkuana, ti ama ti kalib-inna ti mapabasol agsipud ta adda mapapati a nagsusikanda mainaig iti pannakamanehar ti talon ken dagiti pastorna a baka.

Ngem segun iti report, nakabase iti Italy ti mapapati a kinasusik ti biktima.

Kabayatanna, addan iti kustodia ti kapolisan ti Bantay ti kopia ti footage ti CCTV a naalada iti Mira Hills Resto Bar ket nakasaganan nga isubmiteda iti Cyber Crime Group ti Police Regional Office 1 tapno marebio no nairekord ti nasao a pammaltog.#