Footer

Libre a kasar para 19 pares, insagut ti local a gobierno ti Cabugao

CABUGAO, Ilocos Sur – Tapno agbalin a legal ti panagtipon dagiti agdendennan ngem saan pay a nagkasar nga agassawa, nangipaay ti lokal a gobierno ditoy iti maysa a mass wedding a naangay iti Cabugao Cultural and Sports Complex ditoy idi Pebrero 20.

Segun ken ni Cabugao Municipal Civil Registrar Rosario Corazon Sison-Abara, sangapulo ket siam nga asmang a nagtiptiponen ngem saan pay a nagkasar ti nagkallaysa iti sibil iti panangannong ni Mayor Josh Edward S. Cobangbang.

Tinawen a serbisio nga ipapaay ti lokal a gobierno ditoy, libre a maipapaay ti mass wedding no sadino a nasagutan dagiti nagkasar iti cake, pangngaldaw, ken saggaysa tunggal couple a regalo a mismo nga inyawat da Mayor Josh Edward S. Cobangbang ken ni Vice Mayor Deogracias Jose Savellano iti panangbayabay dagiti konsehal ti ili a pakaibilangan da Sangguniang Bayan Member Danilo Q. Gazmen; SBM Vicky S. Serna; SBM Dr. Jemaima S. Tan-Yee; ken SBM Josefina S. Vallejo, kasta met da Municipal Social Welfare and Development Officer Lydia S. Gazmen ken Municipal Civil Registrar Rosario Corazon Sison-Abara.

Timmabuno pay iti daytoy a pasken ni Santa Lucia Municipal Civil Registrar Edwin H. Ruiz, Presidente iti Philippine Association of Civil Registrars, Region 1 Chapter idinto nga imbagian ni Nestor Bautista ni Provincial Statistics Officer Reynor Fernando.

Iti mensahe ni Mayor Cobangbang, pinagyamananna dagiti nagkasar iti agtultuloy a panagtalek ken pammatida iti gobierno munisipal babaen ti pannakipartisiparda iti daytoy a programana.

Innayon ti mayor a karamanen dagiti nagkasar kadagiti mangbangon iti responsible a pamilia a pangrugian ti natibker a pondasion ti naurnos ken naprogreso nga ili a kas iti Cabugao.#