Footer

PANNAKASALUAD TI ESPIRITU TI EDSA PEOPLE POWER

Komentario ni Eden A. Alviar

TI pannakarambak ti maika-31 nga anibersario ti umuna a People Power Revolution sadiay Epifanio De los Santos Avenue idi Pebrero 22 – 25, 1986 ket iyanninawna ti in-nuten a panagkupas iti lagip dagiti Pilipino ti kaipapanan dayta uppat nga aldaw a naindaklan a paset ti pakasaritaan ti Pilipinas.

Ti nakappia a panagalsa dagiti soldado ti Reform the Armed-Forces Movement babaen ti suporta dagiti adu a sibilian a nangpadisi iti turay iti daydi Presidente Ferdinand Marcos ken nangisaad ken ni Presidente Corazon Aquino ket nangted ti baro a namnama idi kadagiti Pilipino tapno magun-od ti demokrasia ken panagdur-as ti ekonomia. Nagbalin met dayta a pagwadan ken inspirasion kadagiti taga-sabali a pagilian tapno rumuk-atda iti pannakatengngelda.

Saanen a mailibak nga umad-adun dagiti Pilipino ti nakalipat iti puon ken gapu ti panagkaykaysa dagiti riniwriw nga umili sadiay EDSA kas sungbatda iti apila iti Radio Veritas daydi Arsobispo ti Manila Jaime Cardinal Sin idi sardam ti Pebrero 22, 1986, a mapanda salakniban dagiti rebelde a soldado nga indauluan da Defense Minister Juan Ponce Enrile ken Armed Forces of the Philippines Vice Chief of Staff Lt. General Fidel Ramos kalpasan daydi press conference a nangirakurakanda ti isisinadan iti administrasion. Nagkuta idi dagiti rebelde a soldado kadagiti dua a nagsango a kampo ti militar iti abay ti EDSA – ti Kampo Emilio Aguinaldo ken Kampo Rafael Crame. Agpeggad idi dagiti rebelde a soldado iti panangraut dagiti nabileg a puersa ni AFP Chief of Staff Fabian Ver a nagtalinaed a napudno iti Commander-In-Chief, daydi Pres. Ferdinand Marcos.

Umad-adun dagiti makalipat iti sakripisio ken kinatured dagiti adu nga umili a sibilian pakairamanan dagiti adu a papadi, mamadre, nataengan, ubbing ken agtutubo a nangibarikada kadagiti bukodda a bagi tapno saan a makaabante dagiti panggerra a tangke a naibaon a mangpaksiat kadagiti rebelde. Adun dagiti nakalipat ken saanen a makaammo iti daydi aldaw a ti Pilipinas ket naaddaan iti dua a nagsapata a Presidente ti pagilian – ni Marcos sadiay Malacañang, ken Aquino sadiay Club Pilipino; ken iti karabianna ket pimmanaw iti Palacio ti nabayagen a nagturay a pangulo. Adun dagiti saan a makabigbig a babaen ti sangsangkamaysa a panagtaklin ken panagkararag iti Dios dagiti adu a Pilipino ket nagbalin a nakappia dayta a panagalsa.

Naulit pay ti EDSA People Power Revolution idi Enero 20 – 21, 2001 idi imbabawi ti AFP ti suportada ken ni Presidente Joseph Estrada kabayatan ti pannaka-impeach-na sadiay Senado gapu iti pammabasol kenkuana ti gayyemna a ni Ilocos Sur Governor Luis Singson iti panagawatna iti pasuksok para ti sugal a hueteng, ket naisaad ni Presidente Gloria Macapagal Arroyo.

Kalpasan ti naballigi nga EDSA People Power Revolution, nagbalin daytoy a nakappia a panagalsa kadagiti umili iti Germany tapno marebba ti Berlin Wall a nangbingay ti pagilian iti adu a tawen, ken dagiti sigud nga agindeg kadagiti pagilian a naikappeng iti sigud a Union Soviet Socialist Republic tapno mawarada dayta a komunista a nasion. Nagbalin pay dayta a nagulidanan dagiti umili kadagiti nagduduma a pagilian iti Asia, Europa ken Africa a nanggun-od iti demokrasia. Ngem iti Pilipinas, saan a nataginayon wenno nasalimetmetan ti kaipapanan dayta a maibilang a milagro a pagteng.

Iti kaudian a pannakarambak ti anibersario ti EDSA People Power Revolution ket saanen a kas kadagiti nagkauna a selebrasion gapu iti kinakurang ti interes ti agdama nga administrasion ni Presidente Rodrigo Duterte. Para kadakuada, ti pannakataginayon ti panagrambak ken espiritu ti People Power ket pannakaipigket iti napalabas a tubeng iti pannakagun-od ti naan-anay a kappia ken panagdur-as ti ekonomia.

Para ken Duterte ken dagiti kameng ti Pamilia Marcos nga in-inuten a nakasubli iti turay, ti lagip ti EDSA People Power Revolution ti agtultuloy a mamagsisina kadagiti Pilipino nga agingga iti agdama ket kasla batibat kadagiti umili a saan a makalipat kadagiti lagip ti panagabusar idi panawen ti Martial Law.

Supiaten dagiti nakikaysa iti umuna nga EDSA People Power ti pagtaktakderan ti administrasion iti matagtagilag-an a kaipapanan ti anibersario ti pasken, kas iti panangkontrada iti panangipalubos ni Pres. Duterte ti pannakaitabon ti bangkay daydi Pres. Marcos sadiay Libingan Ng Mga Bayani. Para kadakuada, ti EDSA People Power Revolution ket nasken ti agtultuloy a panangrambak tapno saan nga agkupas wenno mapunas iti lagip dagiti Pilipino ti kaipapanan dayta a pasamak a nangiyanninaw ti panagkaykaysa dagiti umili tapno magun-od ti naindemokrasiaan a turay. Para kadakuada, nasken a maipasa kadagiti ubbing, agtutubo ken iti sumaruno a henerasion ti espiritu ti kinatured ken kinatibker a sumupring iti turay a mangtengngel kadagiti umili tapno malapdan ti pannakaulit ti napalabas.

Kagiddan ti maika-31 nga anibersario ti EDSA People Power Revolution ket limtuad dagiti adu a kontrobersia a maibatbato kadagiti opisial iti agdama nga administrasion – ti pannakapapatay dagiti nasuroken a 7,000 a biktima kadagiti police operations ken extra judicial killings iti kampania kontra illegal a droga, pannakainaig dagiti dadduma a polis iti panagabusar ken dadduma pay a krimen, ken dagiti pammabasol ti kurapsion ken kaadda dagiti saan a mailawlawag a kinabaknang dagiti opisial.

Adu dagiti nakikaysa iti EDSA People Power Revolution, dagiti lider ti agdama idi nga oposision ken dagiti rebelde a soldado, ken dagiti adu a lider ti Pammati, dagiti mangtubtubngar kadagiti dakes a mapaspasamak iti agdama a panawen. Konkondenarenda dagiti mapaspasamak a pammapatay ken pannakaabusar ti kalintegan dagiti tattao kabayatan ti gerra kontra illegal a droga. Agamakda a no saan a matubngar ti saan pay a natawenan a turay ket mabalin nga agsubli manen ti pagilian iti panawen a nakettel ti demokrasia.#

Comments are closed.