Footer

Ti Pagadalan, Ti Agrikultura ken Dagiti Adalan

SINURSURAN

Kolum ni Jobert M. Pacnis

KALPASAN ti flag ceremony kadayta nga agsapa. Indalimanekna ti nausar a sound system iti kuarto ti Supreme Student Government (SSG) a pagserbianna nga adbayser. Isu ngamin ti nakaikumitan daytoy ket obrana nga i-set up iti tunggal agsapa. Idi, mangbaon laeng iti sumagmamano nga adalanda. Ngem napaggangen ta naggagatel dagitoy– ti la makudkuditda a pakadaddadaelan ti sound system-da.

Inlukatna dagiti tawa a jalousie iti likud tapno maanginan iti uneg. Ngem iti itatan-awna iti tawa tapno tan-awanna ti baybay iti labes ti nabatbati a kadagaan iti likudan ti pagadalanda, naipasabat kenkuana dagita mulada a kamotit a kasla nagnaan iti sangapulo a baka. Naalat-at, naibalibaliktad dagiti lanut ken nakurob dagiti puonda.

Rimmasuk ti riknana ta ammona lattan a trabaho dagiti “baka a dua ti sakana” ti napasamak. Sigurado a di mastrek dagiti napaypayso a kalding ken baka gapu ta nabiit pay nga inaladanda.

Tinurongna dagiti ubbingda iti kaabay a siled ti SSG. Kinasaritana dagitoy, ta awan pay ti maestrada, no adda nakitada a nagkali iti kamotit. Maysanmaysa ti nagsao. Malaksid kadagiti ubbingna iti TLE 9, adda kano pay Grade 8 ken Grade 10. Awan ti Grado 7 ta iti old site, singkuenta metro iti dayaen ti new site, ti ‘yanda.

Nagkubuar ti riknana. Inlistana ti nagan dagiti ubbing a karaman iti pasamak.

Saan a tagidaksen ti riknana no dagiti ubbingna laeng iti TLE 9 ken TLE 10 ti nagnaar ta dagitoy ti kaduana a nagdalus iti nagmulaanda— nupay naynay nga agpapaanawa laeng ti obrada no panaggagarden. Ti makadakes, rimmaman dagiti nakita iti inlibas a panagapit. Naawisda kano iti nakitada ta nagdadakkelan dagiti bagas ti kamotit.

Impakpakaunanan kadagiti sumagmamano nga ubbingna a mammaminsanto nga apitenda iti naituding nga aldaw. Sumagmamano laeng dagiti ubbingna ta nabingaybingay iti uppat a major ti TLE: foods (panagluto), beauty care, horticulture (nga iggemna) ken computer hardware servicing. Agpili dagiti ubbingda iti kayatda kas mayannurot iti pagesmanda.

Inukkonna dagiti nairaman iti “inlibas a panagapit”—dina kayat nga awagan iti “panagtakaw” ta kasla man la nadagsen unay aglalo ket ubbing dagiti nagaramid. Kinasaritana dagitoy; binagbagaanna ida; sinimpuonna no asino ti nangirugrugi. Rimmuar a dagiti met laeng sumagmamano nga ubbingna iti TLE 9– dagidi inawaganda iti “balanghoy boys” (nagalada manen idi iti bagas ti kahoy)!

Idi kapatpatangna dagitoy, adu ti dimmayamudom ta dida kano met nagkali, nagbuybuyada laeng. Sa kaslada payen kumilaw kenkuana—aglalo dagiti lallaki a sabali ti major-na. Ngem impilit latta dagiti kangrunaan a suspek a karaman dagiti agrekreklamo. Adu kano met ti inyawidda kadaydi aldaw a panagalada kalpasan ti eksaminasion iti aldaw. Half-day idi ti klase ta nagmimitingda a titser.

Nupay kasano ti panangpakalmana kadagiti ubbing, kasda lattan kayat ti sumangdo manen. Kumunisilapda, saoda a sao a dida mangipangpangag iti saona.

Napangilangil laengen. Naruamen iti kasta nga ugali dagiti dadduma nga ubbingda—aglalo dagiti saanna a kapada iti dila. Ditoy pagisuruanna, sabali ti dila ti kaaduanna. Napaneknekanna a sabali met ti ugali dagitoy. Kasla awan ik-ikkanda aglalo kadagiti ganggannaet a mannursuroda. Kasano, konsintidor dagiti nagannakda!

Naimbag pay dagiti kapadpadana iti dila ta adda panagraemda kenkuana nupay dida kailian.

Inyumanna ti amin iti prinsipalda. Napaayabanda iti opisina ti prinsipal ket nagsasaritada.

Natangken latta ti salawasaw dagiti lallaki, pati babbai, a dina kapada ti dila. Ngem inaklonda met laeng ti basolda idi agngaton ti timek ti prinsipalda ken ipetteng latta dagiti kangrunaan a suspek a karamanda.

Napagnumuan nga agmulada iti kamotit. Dagiti dadduma, mangtedda kadagiti maimula, uray balanghoy, a kamotit. Di la ketdi agkanay dagiti nagitulanganda. Pinakseten ti init dagiti dadduma nga awan ti ramutda a nabati iti daga.

Pagdaksanna, idi panawenen a pagarawna ti garden tapno mamulaan iti TLE period-da, saanen a napan dagiti nagkarkari ken pulos nga awan insangpetda a maimula wenno timmulong la koma iti panagkettel kadagiti maimula, panagdalus ken panangisagana iti daga. Dagiti lattan ubbingna iti TLE (a dagiti nakabasol dagiti dadduma) ti nakaam-ammo iti amin kalpasan a rinugianna ti nagmula iti dua iras kadayta a Sabado nga iseserrekna. Early registration-da pay ngamin.

(Adda tuloyna)