Footer

3 pagtaengan, dimmapo

STA. CATALINA, Ilocos Sur – Tallo a balay ti dimmapo idinto a nagsagrap iti pannakadadael ti maysa pay a pagtaengan gapu iti uram a napasamak iti Sitio Saranay, Barangay Cabittaogan, ditoy nga ili idi malem ti Enero 31.

Kas maibatay iti report manipud iti polis, idi agarup 2:15 ti malem ti nadakamat a petsa, nakita laengen da Lourdes Ramboyon y Rapacon, ipag ni Patricio, ken ni Shirley Regapala y Alejo, 47, a maur-uram ti kusina ti balay ni Patricio Ramboyon y Rabilas, 66, naasawaan, mannalon.

Nagwaras ti uram ket linamutna ti dua kadsaaran a balay da Lourdes ken Jonathan Aboliso, agtrabtrabaho iti sabali a pagilian, ket nairaman koma pay a dimmapo ti balay ni Melvin Ragsag y Pacheco, 28 no saan a simmangpet dagiti bombero manipud kabangibang nga ili.

Nadepdep ti uram idi agarup 3:55 ti malem.

Mapapati a sakbay ti uram, in-plug ni Patricio ti maysa a rechargeable flashlight iti outlet iti diding iti asideg ti kusina sa napan nagsibog iti mulana a cauliflower iti talon.

Napan met nakiminatay dagiti kabbalayna iti barangayda.#

Comments are closed.