Footer

EDITORIAL: Gerra Kontra Illegal a Sugal

KALPASAN a pinaisardeng ni Presidente Rodrigo Duterte ti panangiyimplementar ti Philippine National Police kadagiti anti-illegal drugs operation gapu kadagiti kontrobersia a nakainaigan dagiti polis, immandarna iti PNP nga ipamaysada a paksiaten ti panagraira ti illegal a sugal.
Kas ti parnuayen ti illegal a droga, adu a kinadakes ti patauden ti sugal kadagiti umili. Adun dagiti babaknang dagiti pimmanglaw gapu iti sugal. Adun dagiti nakaaramid kadagiti nagduduma a krimen kas ti kurapsion, panagtakaw, pammapatay ken dadduma pay a kinadakes gapu iti sugal. Adu metten a napanglaw dagiti ad-adda a rimmigat ti kasasaadda gapu iti sugal.
Adun nga opisial ken agpapaay iti gobierno dagiti nakadispalko wenno nagkurakot ti pondo tapno laeng masustenerda ti panagsugalda nangruna kadagiti naapiangen iti casino wenno derby. Ad-adu pay dagiti marigrigat nga ad-adda a rimmigat ti kasasaadda gapu iti masansan a panagpustada kadagiti illegal a sugal kas ti hueteng, masiao, karera ken dadduma pay a kita ti panagpusta.
Inyetnagen ni Duterte ti Executive Order No. 13 a mangmanmandar kadagiti nagduduma nga ahensia ti gobierno a mangpaksiat ti panagraira ti illegal a sugal iti pagilian. Sagudayen dayta ti pannakaibilin iti PNP, free port authorities ken Philippine Gaming Corporation nga ingetanda ti kampania kontra illegal a sugal.
Awan ti agpaut ken agraira nga illegal no saan nga agbaybay-a dagiti pannakabagi ti linteg kadagiti akemda. Idi pay laeng 1978 nga inyetnag daydi Presidente Ferdinand Marcos ti Anti Gambling Law wenno Presidential Decree No. 1602 a mangipawil kadagiti nagduduma a sugal ken mangdusa kadagiti aglabsing. Ngem awan ti ngipen ti linteg ta agingga kadagitoy a panawen ket ad-adun a klase ti sugal a dumanonen kadagiti nasulinek a lugar. Saan a mailibak nga adu kadagiti pannakabagi ti linteg ti mismo a mapmapan kadagiti pagsusugalan uray pay adda direktiba a mangipawil kadakuda.
Kalaksidan kadagiti nagkauna a number games, timmaud dagiti kabarbaro a big time online gambling operations kadagiti nagduduma a paset ti pagilian kas ti napasamak a nakatiliwan dagiti nasurok a 1,000 Chinese nationals sadiay Clark, Pampanga a nakainaigan ita ti kontrobersial a gambling tycoon a ni Jack Lam, ken dagiti opisial ti Commission on Immigration ken Department of Justice.
Nagraira pay dagiti adu a galiera, tupadaan wenno pallotan iti manok kadagiti nagduduma a lugar iti pagilian nga uray dagiti ubbing ken menor de edad ket makastrekda kadagitoy a pagsusugalan. Uray dagiti natayan ket sinerreken dagiti gambling operators a mangkontrata kadagiti naulila a pamilia tapno makapagpasugalda iti dado ken dadduma pay nga ay-ayam.
Naayat dagiti Pilipino iti sugal ta uray no maiparparit ket adu latta dagiti agsalsalungasing gapu ti kinalukay ti linteg. Iti pakasaritaan ti pagilian, sugal ti nakaigapuan ti pannaka-impeach iti poder ni sigud a Presidente Joseph Estrada gapu ti pammabasol kenkuana ti nasinged gayyemna a ni sigud nga Ilocos Sur Governor Luis “Chavit” Singson. Napadisi ni Estrada iti posision. Nabalud ken nasentensiaan iti kaso a plunder ngem inikkan ni sigud a Presidente Gloria Macapagal Arroyo iti Executive Clemency. Itan, maikadua a terminonan a Mayor iti Manila.
Iti kampania kontra illegal a sugal, maatalan la ketdi ti nabayagen a gambling lord ken dagiti mangipaay ti proteksion kadakuada a pakairamanan dagiti polis, nangato ken lokal nga opisial ti gobierno. Naipadpadamagen ti dakkel a pasuksok para kadagitoy nga agpapaay iti gobierno ngem awan met ti adu a naidarum wenno nadusa
Ita a panawen ni Duterte, impatalged ni PNP Chief Director General Ronald dela Rosa nga awan ti santuenda iti kampania kontra illegal a sugal. Ngem makadismaya ta kadagiti naisayangkat nga anti-illegal gambling operations ket dagiti met laeng kobrador ken dagiti agsusugal kadagiti kalsada ti tiltiliwenda.
Nayuriten iti nakem dagiti adu a Pilipino no sino dagiti nalatak a gambling lord iti pagilian gapu kadagiti kontrobersia a nakainaiganda iti naglabas, ken panagparangda kadagiti adu nga imbestigasion iti Senado. Maallukoy laeng dagiti kaaduan nga umili a mamati a napudno ti agdama nga admininstrasion iti gannuat a mangpaksiat ti panagraira ti illegal a sugal no dagiti big time gambling lord dagiti matiliw, makasuan ken madusa, saan ketdi a dagiti marigrigat a kobrador laeng iti taya. (Eden A. Alviar)

Comments are closed.