Footer

EDITORIAL: Kaso ni Senadora Leila de Lima

PUDNO ngata wenno kinaulbod laeng dagiti kaso a naipila ken ni Senadora Leila de Lima nga adda pannakainaigna iti panagnegosio iti illegal a droga?

Dayta a saludsod ti namagdadasig ti kananakem ken karirikna dagiti Pilipino iti agdama a panawen kalpasan ti boluntario nga isusuko ni De Lima kadagiti ahente ti Criminal Investigation and Detection Group ti Philippine National Police a nangidanon ti warrant of arrest iti opisinana sadiay Senado idi bigat ti Pebrero 24, 2017. Dagus a naitarus ni De Lima sadiay opisina ti CIDG – National Capital Region sadiay Camp Crame para iti pannakaproseso ti pannakaarestona.

Napasamak ti isusuko ti Senadora iti CIDG kalpasan nga imparuar ni Muntinlupa Regional Trial Court Branch 204 Judge Juanita Guerrero ti warrant of arrest ken ni De Lima gapu iti nakaidarumanna a kaso ti panaglabsing iti Republic Act No. 9165 wenno Comprehensive Dangerous Drugs Act idi isuna pay laeng ti Justice Secretary. Nairaman a naibilin a naaresto da Ronnie Dayan, ti driver-bodyguard ken nagbalin a kaayan-ayat ni De Lima, ken sigud nga Officer-In-Charge ti Bureau of Corrections Rafael Ragos.

Dayta a kaso a nakaarestaran ni De Lima ket maysa laeng kadagiti tallo a naipila iti Department of Justice a panaglabsing iti RA 9165 a maatap a nagramut iti pannakikumplotna iti illegal drug trade kadagiti nakabalud a drug lords sadiay New Bilibid Prisons. Mapabpabasol ni De Lima nga impalubosna ti panagnegosio dagiti drug lords iti illegal a droga sadiay uneg ti National Penitentiary kasukat ti minilion a payola nga inaramatna kas campaign fund idi panawen ti kampania idi kandidato pay laeng a senador idi May 2016. Kadagiti naisayangkat a hearing iti House of Representatives, nagtestigo dagiti prominente a drug lords a sigud a nakakulong iti NBP maikontra ken ni De Lima.

Sakbay ti boluntario nga isusuko ni De Lima kadagiti mangaresto kenkuana ket inrakurakna kadagiti kameng ti media sadiay Senado nga awan ti kinapudnona dagiti kaso a naipila kenkuana ngem naimbento dagita a kaso tapno pagulimekenda iti panangtubtubngarna ken ni Presidente Rodrigo Duterte kadagiti mapaspasamak nga extrajudicial killings ken pannakalabsing ti human rights iti Pilipinas manipud pay idi nangrugi a nagakem ti Presidente. Inkarina a saan a makalapped kenkuana ti pannakaikulongna tapno agulimeken wenno agsardengen a mangtubtubngar ken ni Duterte.

Mabigbigbig ni De Lima kas kangrunaan a kritiko ni Duterte. Saan a mailibak ti rurod ti Presidente iti senadora manipud pay nangrugida nga agakem iti agdama a posisionda. Ni De Lima idi ti chairperson ti Commission on Human Rights a nagimbestigar kadagiti pammabasol ti human rights violations kontra ken ni Duterte idi mayor pay laeng sadiay Davao City. Inimbestigar ti CHR ti pannakainaig ni Duterte kadagiti extrajudicial killings ti grupo a naawagan iti Davao Death Squad.

Idi 2016, idi ni De Lima pay laeng ti chairperson ti Justice Committee on Justice sadiay Senado, ket indauluanna ti pannakaimbestigar dagiti mapaspasamak nga extrajudicial killings ken summary executions a dagiti biktima ket mapabpabasol nga adda pakainaiganna iti illegal a droga. Nagpalawag iti imbestigasion ni Edgar Matobato a nangaklonanna a kameng isuna ti DDS nga indauluan ni SPO3 Arturo Lascañas, polis a right hand ni Duterte, ken ti sigud a mayor iti pannakainaigda kadagiti napasamak nga extra judicial killings sadiay Davao City. Gapu iti dayta nga imbestigasion, nasukatan ni De Lima a mangidaulo ti Committee on Justice babaen ken ni Senador Dick Gordon.

Para kadagiti nasanayen iti normal a proseso dagiti kaso iti Pilipinas ket masdaawda iti napartak a pannakaiparuar ti warrant of arrest ken ni De Lima. Uray ti kampo ti senadora ken dagiti abogadona ket nasdaawda iti kellaat a pannakaiyetnag ti bilin ti korte ket saanda a nasaganaan ti legal a remedio tapno naitantan koma ti pannakaaresto ni De Lima.

Adda dagiti mamati a karma ti sagsagrapen ni De Lima ta laklak-amenna ita dagiti padas dagiti impabaludna idi isu pay laeng ti secretary of Justice. Mairaman kadagiti prominente nga impaarestona gapu iti kaso a plunder ket da Pampanga Rep. ken sigud a Presidente Gloria Macapagal Arroyo, ken dagiti tallo a sigud a senador – da Juan Ponce Enrile, Jinggoy Estrada ken Ramon Revilla Jr. Makaduanton ni De Lima da Estrada ken Revilla a nakakulong pay laeng sadiay PNP Custodial Center.

Para met kadagiti makisimpatia ken kakadua ni De Lima iti Liberal Party ken padana a senador, mamatida a ti pannakaibaludna ket paset ti pannakapastidiarna gapu iti agtultuloy a panangtubtubngarna ken ni Duterte. Adda dagiti mamati a napadaras ti pannakaarestona tapno magaburan ti kontrobersial nga isyu a panagbaliktad ni SPO3 Larañas iti sigud a testimoniana iti Senado, ket itan, inakusaranna ti Presidente a nagmandar iti DDS tapno agisayangkatda kadagiti pammapatay.

Para kadagiti Pilipino nga awan ti kankanunonganna, tarigagayanda ti panagari koma ti kappia, kinapudno ken hustisia, ken makapagkaykaysan dagiti umili para iti sapasap a pagimbagan. (Eden A. Alviar)

Comments are closed.