Footer

EDITORIAL: Naatap ti Kappia iti Pilipinas

NAATAP a talaga ti kappia iti nagbaetan ti gobierno ken dagiti rebelde a komunista iti Pilipinas ta kalpasan ti pannakaisardeng ti ranget iti sumagmamano a lawas ken saritaan ti kappia, ket rimsua manen dagiti panagraranget a nakaibuisan ti biag dagiti agpapada a Pilipino.

Immandaren ni Presidente Rodrigo Duterte ti pannakaisardeng ti peace talk ceasefire, ken imbilinnan ti all-out war kadagiti rebelde a kameng ti New People’s Army kalpasan  ti panangpapatay dagiti rebelde kadagiti sumagmamano a soldado sadiay Mindanao. Immuna nga inyatras dagiti rebelde ti bilateral ceasefire gapu ti saan a panangpagusto ni Duterte iti dawdawatenda a pannakawayawaya dagiti 400 political prisoners.

Immunan a nawayawayaan dagiti 18 a kangrunaan a political prisoners a nagserbi a kas consultant ti Communist Party of the Philippines National Democratic Front kabayatan ti pakauna a paset ti peace talk sadiay Netherlands.  Saan a nawayawayaan dagiti kaaduan a political prisoners ta segun ken ni Duterte, ket dumaldalanda iti napaut a proseso ta sumangsangoda kadagiti nagduduma a kriminal a kaso, ket kasapulan ti bilin ti husgado. Impaganetget pay ti Presidente a mawayawayaanto koma dagiti political prisoners kas bunga ti naballigi a peace talk iti nagbaetan ti Government panel ken CPP – NDF panel.

Kasano pay nga agballigi ti peace talk no mapatiliw metten dagiti NDF ‘consultants ken agrangrangeten dagiti tropa ti gobierno ken rebelde? Imbabawin ni Duterte ti Joint Agreement on Security and Immunity Guarantee a nangpatalged iti saan a pannakatiliw dagiti NDF consultants bayat ti peace talk. Immandaren ti Presidente kada Defense Secretary Delfin Lorenzana ken Armed Forces of the Philippines Chief of Staff General Eduardo Año, ti pannakaisubli dagiti operasion kontra kadagiti rebelde ken pannakaaresto dagiti NDF consultants ken pannakaisublida kadagiti pagbaludan.

Adu dagiti masayangan iti pannakalilibeg ti saritaan ti kappia ken pannakaisardeng ti ranget iti nagbaetan ti gobierno ken rebelde. Mairaman kadakuada da Government Chief negotiator Labor Secretary Silvestre Bello III ken NDF Chief rebel negotiator Fidel Agcaoili gapu ta napalaus ti namnamada nga agballigi ti gannuatda. Adu met a sektor dagiti mangal-allukoy iti Presidente ken dagiti rebelde nga ituloyda ti saritaan ti kappia. Ngem adu met dagiti nalimed a mangsabsabotahe ti gannuat ti kappia gapu kadagiti bukodda a panggep ken interes.

Adda dagiti mangnamnama nga iti laksid ti kadagsen dagiti balikas nga inibbatan ti Presidente kadagiti rebelde ken panangimandarna iti all-out war kontra kadakuada, ket mabalin nga agbaliwto met laeng ti pangngeddengna, kas impanekneknan kadagiti immun-una nga addangna. Adu dagiti mamati a sinsero ti Presidente ti tarigagayna idi a mapasardengen ti aglima-dekadan a gubat iti nagbaetan ti gobierno ken dagiti komunista ta saan pay idi a nakapagtugaw iti akemna ket inusatannan ti pannakairugi ti patangan ti kappia babaen ti pannakisaritana iti sigud a propesorna a ni CPP Founding Chairman Jose Maria Sison. Dinutokanna pay a kameng ti gabinetena dagiti tallo a nominado ti CPP – NDF.

Kidkiddawen met dagiti leftist a miembro ti gabinete ni Duterte a da Social Welfare Secretary Judy Taguiwalo, Agrarian Reform Secretary Rafael Mariano, ken National Anti-Poverty Commission Chairperson Liza Maza ti gobierno tapno saan a mapukaw ti nagun-odda iti nayusuaten a saritaan ti kappia. Mamati dagitoy a cabinet members a nasken a maituloy ti saritaan ti kappia ta adun dagiti social issues nga ikagkagumaan a solsolbaren ti administrasion.

Nasayaat koma no dagitoy tallo a leftist a kameng ti gabinete ni Duterte ket dawatenda kadagiti rebelde iti CPP-NDF-NPA ta agkaykaysada iti decision ken tignay, ken nga ikagumaanda a maituloy ti saritaan ti kappia. Nakaskasdaaw ta agparparang ti saan a panagsinnurot ti pangngeddeng dagiti opisial ti CPP-NDF, ken dagiti NPA. Kabayatan ti patangan ti kappia sadiay ballasiw-taaw ket mapaspasamak met dagiti panaglabsing iti ceasefire a puon ti nakarurodan ni Duterte. Aglimapulon a tawen dagiti nadara a ranget iti nagbaetan ti gobierno ken dagiti rebelde a komunista. Saan laeng a dagiti soldado ken rebelde dagiti biktima iti daytoy a riribuk. Ngem kaaduanna ket dagiti sibilian nangruna dagiti napanglaw ken dagiti agnanaed kadagiti away. No saan a magun-od ti kappia iti termino ni Duterte, narigrigatton kadagiti sumarsaruno nga administrasion.

No dagiti mangidaulo ti gobierno ken dagiti rebelde ket ti pudno a tartarigagayanda ket ti sapasap a pagimbagan dagiti umili, nasken a laksidenda dagiti bukodda nga interes ken pagturayenda ti kinapakumbaba sakbay nga iyusuatda ti saritaan ti kappia ken maisardeng ti ranget. Agari laeng ti kappia iti Pilipinas no tallikudanda ti kinatangsit ken mabigbigda a ti karangrangetda ket kadaraanda a Pilipino ken kabsatda iti imatang ti Dios. (Eden A. Alviar)

 
No comments yet.

Leave a Reply