Footer

Ilocos Sur, Ilocos Norte sinelebraranda Maika-199 nga anibersario ti panagwayasda a probinsia

SALAYSAY NI SALVADOR A. ESPEJO

VIGAN CITY – Sinelebraran ti probinsia ti Ilocos Sur ken Ilocos Norte ti Maika-199 nga anibersario ti panagwaywayasda a probinsia itay Pebrero 2, 2017.

Iti Ilocos Sur, kas panangrambak iti daytoy nga aldaw, impaulog ni Governor Ryan Luis V. Singson ti Executive Order No. 01, series of 2017 a masuspenso ti opisina kadagiti amin nga ahensia ti gobierno ken klase iti publiko ken pribado a pagadalan.

Dinakamat pay ti nasao a pammilin nga intuding ti Seksion 16 ti Local Government Code ti panangsuporta ken panangtagiben dagiti lokal a government units iti pannakapreserba ken pannakapabaknang iti kultura, pannakaidur-as ti salun-at ken karadkad, pannakaitag-ay ti kalintegan ti umili para iti balanse nga ekolohia, panangidarirag ken panangsuporta iti panagdur-as iti sientipiko ken teknolohikal a kapabilidad.

Tampok ti selebrasion ti Kannawidan Ylocos Festival a nangrugi itay Enero 27 ken aggibus inton Pebrero 12. Maang-angay ti selebrasion iti Barangay Tamag, Vigan City, iti amianan ti University of Northern Philippines, saan a kas iti napalabas a maar-aramid iti Quirino Stadium, Bantay. Maisagsagana ngamin ti istadium para iti maarangay a 2017 Region 1 Athletic Association Games (RIAA).

Nangrugi ti selebrasion babaen ti “Sun Soaked 2017” a pasalip iti sports a naangay iti igid ti baybay ti Barangay Pug-os, Cabugao, Ilocos Sur idi Enero 30. Pormal a naglukat ti festival babaen ti maysa a ritual nga inangay ti panangamaen ti maysa a tribu ti probinsia ken iti panaglukat dagiti exhibit dagiti maipagpannakkel a produkto iti probinsia ken ti concelebrated mass a naangay iti Saint Paul Cathedral ken iti pannakaiprosision dagiti dagiti duog a karro dagiti nadumaduma a santo iti probinsia a nakipartisiparan dagiti agtuturay ti probinsia, empleado, nadumaduma a grupo ken residente.

Kabayatan ti festival, naangay dagiti nadumaduma a pasalip a kas iti band competition, dance contest, quiz bee, poetry writing, traditional games, panagluto, pannangan iti longganisa, pasalip iti arte, drag racing, ken dadduma pay a Delphic games.

Naangay pay dagiti pasalip iti kadakkelan a produkto iti agrikultura ken dingnguen, Siglat Awards a nakagunggonaan dagiti outstanding a barangay, grupo ken indibidual nga agtuturay iti barangay ken iti pannakaited ti presihioso a Father Jose Burgos Awards no sadino a nabigbig dagiti annak ti Ilocos Sur a nagballigi iti propesionda wenno iti tay-ak iti negosio, literatura, akademia, siensia ken dadduma pay.

Kinuna ni Governor Ryan Singson a babaen ti Kannawidan Ylocos Festival, ad-adu pay a residente ken bisita ti maawisda a makipartisipar inton Pebrero 2, 2018 a pannakarambak ti Maika-200 nga Anibersario ti panagsina ti probinsia ti Ilocos Sur ken Ilocos Norte.

(Adda tuloyna)

Comments are closed.