Footer

Ma’am Jeralyn

Imbiit ni Rilo A. Bedo

“APAY a kasdiay a naguyong ni Ma’am Jeralyn, sir?” inamad ni Marah, maysa kadagiti estudiante iti Grado 11. Naranaandak, kaduana ni Lyka a barkadana, iti garden iti likud ti CR kadayta a break iti agsapa. Applied Economics ti subject-da kaniak.

“Baka natulengkayo, a?” kinunak kabayatan ti panagikkatko kadagiti makitak nga igges nga agdadael kadagiti mulak a tarong iti sako.

“Sammet, a, sir,” immisuot ni Lyka. “Ammomi met no naglablabeskami tapno makaunget koma ti maestra wenno maestromi.”

“Wen, sir. Sobra a talaga ni ma’am.”

Filipino ti iggem ni Ma’am Jeralyn kadagiti adda iti GAS wenno general academic strand. Tallopulo ket walo a katukkolnan. Dua ti anakda ken ni Dison a lakayna. Dati nga OFW ni Dison ngem dua tawenen sipud napagawid ta adda madi nga ugalina a naduktalan ti amona bayat ti panagserbina a kas drayber. Tambay ita—bale isu ti mangas-asikaso kadagiti annakda no awan ti papananna.

Sabagay, nadlawko metten dayta nga ugali ni Ma’am Jeralyn. Nadanonkon ditoy Cabaybay West National High School idi naalaak nga agisuro.

Adda daydi estudiantemi a pinagsasawanna ta saan kano nga inkaskaso daytoy. Ngem kasano a mangngeg ti ubingmi ti impukkaw a panangayabna kadaytoy ket apagisu a tallo a nakamotor ti limmabas iti sango ti pagadalanmi idi. Bin-igda a naka-muffler ket permi nga ariwawa dagiti luganda. Dayta nga ariwawa ti naigiddan iti timek ni Ma’am Jeralyn. Di kad saan a nangngeg ‘diay ubing ti pukkawna. Dayta, permi la ketdin a panagsasaona.

Uray pay kadakami a kakaduana. Naglaing nga agbaon. Arig dina kayat ti tumakder iti tugawna no adda ar-aramidenna. Payawatna uray bond paper laeng a masapulna. No adda bulodenna, ket nailaw-anmo nga imbaga nga adda kenka (kas pangarigan, getteng wenno correction tape), saannanto pay laeng a takderan ti lamisaanna. Sika ti mapan iti yanna tapno yawatmo ti masapulna.

Pagdaksanna, no di naala a dagus ti binulodna, ibagananton a naisublina ta awan metten iti lamisaanna. Antagayam, dinan ammo ti nangip-ipananna. Maisagadto laengen dagiti ubbing manipud iti sirok ti lamisaanna.

Iti naminsan, nasalapon ti aglamlampaso nga ubingmi. Kasano, adda kasarsaritana iti selponna idi sumrek iti office-mi. Nakatalikud met iti ridaw ti ubingmi isu a dida nagkinnita. Dayta, permi a panagsaonan. Nadadael kanon ti sapatosna a nadungpar ti lampaso. Nasipatna (kas ruamna) pay ti ubingmi. Naimbag ta saan a nagreklamo ti ubingmi nupay nakitak a nakagatna ti bibigna iti sakit a nalak-amna.

Isu a diakon a nasdaaw idi naalimadamadko nga aw-awaganda ti liklikudanna iti Ma’am Sipatero. Binaliwandan ti Sapatero nga apeliedo ni lakayna.

“Ala, ket salaanyo, a,” kinunak kada Marah. “Sayaatenyo latta ti ipakitayo kenkuana.”

“Makauma pay ketdin, sir, dayta binigat a panagsermonna,” kinuna ni Marah.

“Iramanna ti amin uray maymaysa laeng ti kapungtotna,” innayon ni Lyka.

Yamanek ketdi ta uray nabiitak pay ditoy CWNHS, mariknak a naalakon ti panagtalek dagiti ubbing. Ta asino koma ti mangibaga ti problemada iti titserda iti kas kaniak a kabaddungalan ti ipulpulongda no awan dayta a panagtalek?

Panagtalek ken panagraem, dagita ti an-annadak a mapukaw dagiti ubbing nga ipamatmat kaniak. Ta ania pay ti serserbim a mannursuro no liblibianda met ti liklikudam?

ADDAAK iti 10-Ruby a kaabay ti 11-Amethyst kadayta a malem ti Mierkoles. Madama ti evaluation-ko kadagiti ubbingko babaen ti post test nga intedko kadakuada isu a naulimekda.

Ni Ma’am Jeralyn ti adda iti bangir. Madama manen ti ungetna. Nalawag a mangngegmi dagiti ibagbagana.

“Saandak a pagbabastosan, a?” indil-agna. “Serioso itong klase natin. ‘Wag maipasok-pasok ‘yang tungkol sa condom. Mga isyung panlipunan ang tinatalakay natin.”

“’Yun nga, ma’am,” natimkak ni Dexter a klasena. “Di po ba laganap ang teenage pregnancy ngayon? Kaya nga naisipan ng DepEd na magpamudmod ng libreng condom para sa mga kagaya namin!”

“Diyan kayo magaling! No adda pakainaiganna iti seks, saankayo a paudi. Dikay’ la maalas!”

Mamedmedmedan ti ayek-ek dagiti adalak. Inseniasko nga agulimekda ta baka no mangngeg ni Ma’am Jeralyn ket umayna ida armalayten iti ngiwatna.

“Siguro, hindi kayo tinuruan ng magagandang asal ng mga magulang ninyo? Kay babata pa ninyo, ‘yan na ang laman ng mga isip ninyo! Bastos kayo!”

Napangilangilak laengen.

BIERNES, agabay manen ti kuartomi ken ni Ma’am Jeralyn. Pinabagkatna kadagiti ubbingna ti LCD TV a pagbuybuyaanmi iti office. Agpabuya kano iti in-download-na a movie a mainaig iti topikona.

Saanna nga iggem ti laptop-na ta nadadael ti port-na a para HDMI. Kapilitan nga in-save-na lattan iti USB ta isu kanon ti isaksakna iti likudan ti telebision.

Gapu ta saanna a kabisado ti kutkutienna, nagumbi a badangak a mangi-set iti TV aglalo ket di pay naigatangan iti baterya ti remote-na. Sabagay, mabalin latta ta adda met pagitalmegan iti baba a likud ti TV.

Sineniasak lattan dagiti ubbingko a yuraydak biit ta adda laeng asikasuek iti kaarrubada a siled.

Insaksakko iti outlet ti extension wire ta impaiparabaw ni Ma’am Jeralyn ti TV iti lamisaan iti tengnga a sango ti kuarto. Saan ngamin a makadanon ti plug ti TV iti outlet.

Idi nai-switch-kon ti TV, imbagak ken ni Ma’am Jeralyn nga isalpaknan ti USB-na iti USB port iti likud.

Apagsalpakna, ken diak pay nagpindot tapno mapanak iti search icon, idi napaikkis ken nagpapaggaak dagiti klasena.

“Alla, ney! Ania daytan?” kinunada.

Idi kitaek ti screen, madama metten ti gubal ti dua nga asmang. Makita amin a kinarakaranda! Naapputko pay dagiti bibigko.

Umlekak la koma ngem minedmedak ti riknak.

“Tagarienyo?” naala pay laeng ni Ma’am Jeralyn ti nagunget.

Insungok ti screen. Darasna a kinita ta adda isuna iti likudan daytoy.

Iti pannakakitana iti eksena, kasta unay ti labbasitna. Pinardasanna nga inuksot ti USB-na. Kunak no ituloyna ti agunget ngem awanen ti simngaw a timekna.

Nasiputak ti panagkikinnissiim dagiti adalanna.#.

Comments are closed.