Footer

Mare, Kastoy ti Aramidem…

SINURSURAN: Kolum ni Jobert M. Pacnis

(Umuna a paset)

 

ALDAW Dagiti Puso. Panawen a kasta unay ti panagayamuom ti ayat iti puso ti tunggal maysa aglalo dagiti agtutubo. Panawen ni Kupido.  Kuna dagiti sutil, daytoy nga aldaw ti pudpudno a Baro a Tawen.

Awan met ketdi ti papanan ti tunggal maysa no di ti agayat ken paayat— nga agtunged iti nasam-it a panagsapata iti sango ti altar no mataripato dayta nga ayat.

Ti laeng yanna a pagdaksan, ‘Mare, bayat ti panagdenna a kas agassawa dagiti agkaasmang, rumtab dagiti parikut a no di mangtenneb iti relasion, mangrakrak iti maysa a pamilia.

Normal ti kaadda ti parikut iti tunggal pagtaengan. Ngem saanen a normal no daytoy a parikut ti pakarakrakanna. Agduduma, wen, dagiti rason a matippuog ti maysa a pagtaengan. Ngem naynay nga agramut daytoy iti agassawa. Ti pannakasolbar ngarud dagitoy a parikut, masapul a mamunganay kadakuada a dua. Saan kadi, ‘Mare?

Tapno ngarud mapagtalinaed ti bara ni ayat iti pagtaengan, ket saan a tumapuak iti tawa a kas kunada, kayatko man nga ibinglay ti nasakdok iti peysbuk, ‘Mare:

Ania man ti situasion iti uneg ti pagtaengan, liklikan ti panagbugkaw wenno panangbugkaw. Mangipakita laeng daytoy iti kinaawan ti respeto iti tunggal maysa.

Saan nga irakrakurak, ipadpadamag dagiti pagkapsutan ti asawa uray pay iti pamiliam wenno gagayyem. Masapul a duakayo laeng nga agassawa ti makaammo kadagitoy. Oras a “naitsismis”, saan a maliklikan ti panagsakit ti nakem a mabalin a mangpalamiis iti panagdenna.

Liklikan ti kinaarsagid, kina-moody no makisarita iti asawa amangan no sabali ti pangipapananna. Saan koma a mabalin ti “defensive” la unay. Ad-adda nga agatap ti asawa.

Liklikan pay nga idasig ti asawa iti sabali a lalaki. Aglalo la ngaruden no iti “performance” iti pribado a siled. Saanmo nga ammo no kasano wenno ania ti biag a nagdaldalananna. No mapitikmo ti ego-na, mabalin a tumalaw iti pusona ti panangipategna kenka.

Saanna a rebbeng a papasan ti asawa no kagura dagiti gagayyemna. Ti laeng asawa ti akinrebbengna a manggura kadakuada. Ipalagip  daytoy ti lokal a buya iti aglawlawtayo. Addada dagiti babbai a mangsuksukon kadagiti assawada iti nakiinninumanda gapu iti nalimed a gurada kadagiti barkada ti asawada. Ngem di koma a kastoy ti maaramid ta sigurado a dakkel a kantiaw iti asawa a lalaki. Ander, mabalin nga ikantiaw dagiti barkadana. Di kad’ agdas-alto ti pungtotna iti asawana?

Laglagipen met nga inasawanaka ti asawam– saan a ti katulongyo wenno asino man. Rebbengna ngarud a sika ti mangakem iti responsibilidadmo kenkuana. Dimo ipaakem iti sabali. Responsibilidadmo isuna. Dungnguem a naimbag. Ipariknam ti pammategmo kenkuana.

No dadduma, adda dagiti gundaway nga imaima ti asawa nga agawid. Mabalin a saan pay a nagsueldo wenno saan a nakasapul iti nakiteggedanna. No kastoy, saan koma nga ungtan wenno pagsasawan a dagus. Awaten ti situasionna. Gutigoten ketdi a yad-addana pay ti agsalukag, agtrabaho para iti pamilia. Ti dakesna ngamin no maminsan, ngiwat nga ala-armalayt ti maipasabat ti kadawyan a maipasabat kadakuada. Saan man la a maapresiar dagiti sakripisiona iti nagmalem.

Ipategmo ti nagbannogan ti asawam. Saan nga agbalin kas ‘tay kunkunada a one-day millionaire. Aggasto laeng kadagiti kasapulan iti uneg ti pagtaengan, saan a kadagiti material a banag. Sursuruen ti agbadyet.

Saan a bugkawan wenno kariten ti asawa iti sanguanan dagiti annak. Saan nga aramid daytoy ti nanakem, manakem a tao. No adda parikut wenno di pagkinnaawatan, solbaren a siuulimek. Pagpatangan, saan a pagapaan iti sango pay met dagiti ubbing.

No kasapulanna ti ayat/makiinnayat, di pulos nga agpambar nga adda sagubanit wenno madmadi ti rikna. Ited ketdi dayta a kasapulanna. Napateg daytoy iti maysa a lalaki. Sika met laeng ti agparikut no kasta ti kanayon nga aramidem. Mabalin nga agsapul iti sabali a makaep-ep iti riknana.

(Adda tuloyna)

 

Comments are closed.