Footer

NATIBKER A PAGPANGALAN

Sarita ni Jose Edwin S. Sajonia

(UMUNA A PASET)
“URNONGEM ti puersam ta agpapatangtayo idiay Beverage Court inton Domingo,” nabileg ti timek ni Dr. Barmando.  “Masapul a 100% ti attendance.”

Agmarmaredmedak  a nagtung-ed sako  pinardasan  ti nagpakada. Nakalikudakon idi agtimek manen ti doktor.

“Dimo liplipatan, adda uppat a major subjects-mo iti babaek. Exempted-ka iti eksamen no aramidem ti ibagbagak,” kinunana.

Imbes nga agtarusak  iti kubo nga ayuyangmi  a sangkaklase, nagturongak  iti Library tapno adalek ti singasing ni Dr. Barmondo. Kayatna nga  agresolusionkami  iti University President nga isu ti sumukat iti dandani agretiro a Campus  Dean ditoy Gagan-ayan Campus,  sanga ti Pacific Valley State University.

Kankanayon nga iparipirip ni Dr. Barmondo no matiempuannak ngem ita ta umasidegen ti panagretiro ni Mrs. Rita Sagumaymay, Campus Dean, agdadaraddan metten ti panangpressure-na kaniak a mangkumbinsi kadagiti padak nga estudiante a mangiduron kenkuana a sumukat babaen iti maysa a resolusion a pirmaanmi iti Supreme Student Government. Siak ti nabutosan a Presidente ti SSG iti kampus. Ti adatna, nainget a kasalisalna ni Dr. Precedita Ilanlan, Chairman ti College of Education. Nasaepko a kasla daytoy ti nalimed a pili   ni Dr. Agapito Purrazo, University President, a sukat ti agretiron a Campus Dean.

Nagsig-am ni Ericzon nga immasibay kaniak.  Sekretario ti SSG ni Ericzon.

“Seriosoka ita a, lakay,” nakuna ni Ericzon.

Imbagak ti nasao ni Dr. Barmondo.

“Nagadu a maiprayoridad dita a saan ket a dayta agpolpolitika,” nagmurareg ni Ericzon. “Daytoy la unay panagdalus iti kampus. Datayo metten ti agdaldalus ta saan metten nga agrepreport dagiti dianitor. Agat-ling-et ken nakaang-angsegtayon a sumrek ti klase!”

Gipgipiten ni Dr. Barmondo dagiti dianitor ta suspetsana ida a nangtakaw iti kamera ken laptop iti opisinana. Naisaangen  ti reklamo iti Grievance Committee ti Campus.

Nadakamatko ti panangilagid ni Dr. Barmondo nga addaak iti babaenna.

“Dayta ket ngatan, Mark,” nagrupanget ni Ericzon. “Diak kayat a pagikaruenda ti gradotayo gapu laeng ti ambisionda nga agidaulo!”

Kinonsultak dagiti adda iti babaek. Ad-adu ti agkedked nga agpirma. Indauluan ida da Ericzon ken Jenwar. Sangapulokami nga opisiales iti College Department idinto ta waloda met iti High School Department. Umabot iti dua ribu ket dua gasut ti bilang dagiti estudiante a kameng ti SSG iti intero a kampus.

Ngimmato ti takem ni Dr. Barmondo idi immakar a mangisuro idi naluktan a unibersidad ti gobierno ditoy ilimi a Gagan-ayan. Damag a linakadna ti panagpangatona iti kabagianna a nangato ti takemna iti CHED.

No ar-arigen, isu ti maysa a kabilegan nga opisial  ditoy kampus. Adviser ti SSG, Chairman ti Grievance Com-mittee, Assistant Commandant ti CMT ken Head, Motorpool Department. Saan nga asi-asi a banggaenmi nga estudiante.

BIGAT ti Domingo. Sangapulo ket tallokami a nagatendar. Awan da Jeff ken Jenwar. Tallo met ti awan iti haiskul gapu iti nainkalintegan a rason.

“Apay a ditoy ti pagmimitingantayo, Sir?” inamad ni Mikaela Joy,  pangulo ti Komite ti Membership and Education.

“Bear in mind, karbengantayo met ti agtitipon iti sadino man a kayattayo. Saantayo  a nakasingdan lattan iti eskuela,” kinuna ni Dr. Barmondo.

Impakita ni Dr. Barmondo ti nalpasen a resolusion a pirmaanmi. Inkarina pay a no agpirmakami, mangted iti proyekto iti tunggal klase ti opisial nga aggatad ti P10,000.

“Agpasigak kadakayo. Saanen a nakadidillaw ta kastan ti pannagna ti sistema…” kinunana. “Remember one month more to go, pagbutosanda idiay Board no asino ti sumukat iti agretiro a Campus Dean. Back up daytoy aramidentayo. Aramidekto amin a kabaelak para iti pagimbaganyo no siak ti mapagasatan.”

“Idawatko nga agdalan pay koma iti diskusion sakbaykami nga agpirma, Sir,” kinuna ni Ericzon.

“Alaenmi pay ti consensus ti sibubukel a body, sir,” kinuna met ni Mikaela Joy.

Saan a naipapilit ni Dr. Barmondo ti kalikagumna aglalo ta inayonak dagiti kakaduak. Idi agangay, imbatina kaniak ti kopia ti resolusion.

Idi nakapanaw ni Dr. Barmondo, trinatarmi ti kiddawna.

Adda mayat nga agpirma ngem ad-adu ti nangibatad nga agtakder iti tengnga ti student body. Napagtitinonganmi a maangay ti emerhensia a miting tapno maidalan iti panagbubutos no agpirmakami iti resolusion wenno saan.

LUNES. Pinaayabannak ni Dr. Barmondo.

“Komusta, napirmaanen?”

“A,e, saan pay a sir,” insungbatko.

“Wan sa met lategmo, lokdit! Kita’k man!” intanggayana ti kanawan nga imana.

Inyawatko ti enbelop.

Inruarna ti resolusion. Nakamirdunget a nangpalabas. “Limlimat’ nagpirma! Uray sika, dika pay gayam nagpirma!”

“Rimmuar iti deliberasion a maidalan iti panagbubutos iti maangay nga emergency meeting, Sir,” dandani diak makasngaw.

“Roll your mat if that is the case, Mark! Diak pay napaay, laglagipem. Nakataya ti masakbayam daytoy a kiddawko…”

“No ania ti kayat ti kaaduan, isu ti surotek, Sir,” nakunak a sialumamay ket nagpakadaakon.

Sinurotnak ti tabbaawna idi rummuarak iti opisinana.

(Adda tuloyna)

 

 

 
Comments are closed.