Footer

Pannakaisardeng dagiti Anti-Illegal Drugs Operations ti PNP ken NBI

Komentario ni Eden A. Alviar

 

ANIA ti turongen ken pagbanagan ti kampania ti gobierno kontra illegal a droga kalpasan a temporario a naipasardeng dagiti amin nga anti-illegal drugs operations ti Philippine National Police ken National Bureau of Investigation iti intero a pagilian gapu kadagiti nagsasaruno a nabara a kontrobersia a nakainaiganda?

Immandar ni Presidente Rodrigo Duterte ti pannakaisardeng dagiti amin a police operations aginggana iti saan a madalusan ti PNP kadagiti rinuker a kameng a mangdaddadael ti imahe ti institusion. Imbilin dayta ni Duterte kalpasan ti pimmutok a kontrobersia a nakainaigan da Supt. Raphael Dumlao II, SPO4 Roy Villegas, SPO3 Ricky Sta. Isabel, ken dadduma pay a polis ken sibilian iti panagkidnap ken pammapatay iti negosiante a Koreano a ni Jee Ick-Joo. Napilaanen iti kaso a kidnapping ken homicide dagiti akusado. Ngem agtultuloy pay laeng ti imbestigasion gapu kadagiti mapapati nga adda pay dagiti dadduma a personalidad nga adda pakainaiganna iti krimen kas kadagiti operatiba ti NBI.

Iti laksid ti sigud a panangkankanunong ni Duterte kadagiti polis, kellaat a nagbaliw ti kananakemna kabayatan ti ibebettak ti kontrobersia, ken ti pakauna nga imbestigasion ti Senate Committee on Public Safety and Illegal Drugs. Iti imbestigasion iti Senado, nalukaisan iti publiko ti kinapeggad ken pannakaabuso ti Oplan Tokhang ta inabusar dayta dagiti rinuker a kameng ti PNP tapno kikilan wenno kuartaanda dagiti suspek.

Impakaammo ni Senador Panfilo Lacson a saan nga isolated wenno agmaymaysa ti kaso ni Jee Ick-Joo ta adun dagiti naawatna a report manipud kadagiti Filipino-Chinese a biktima iti inawaganna a modus operandi a “Tokhang For Ransom.” Impabuya pay ni Lacson ti CCTV footage maipapan iti insayangkat dagiti operatiba ti PNP nga anti-illegal drugs operation iti maysa nga establisimiento a nakaalaan iti video ti polis a mangip-ipan iti mapapati a shabu kas ebidensia iti uneg ti drawer ti lamisaan iti opisina a na-raid.

Narurod ni Duterte iti pannakakidnap ken pannakapapatay ni Jee Ick-Joo iti uneg a mismo iti Camp Crame, ken kalpasanna ket na-cremate ti bangkayna iti maysa a funeral service a kukua ti retirado a polis, sa nai-flush dagiti dapona iti kasilia. Impalgak ni Duterte a 40 a porsiento dagiti rinuker a polis ket kasapulan ti pannakadalus ti sibubukel a PNP.

Sinupiat ni PNP Chief Director General Ronald dela Rosa dayta a nairakurak a kaadu dagiti rinuker a polis, ket patienna a 2 a porsiento laeng iti kadagupan dagiti 120,000 a puersa ti PNP. Umad-adun dagiti mangkidkiddaw iti panaglusulos ni Dela Rosa gapu iti panagbaba iti disiplina iti PNP kabayatan ti panagtakemna, ngem sitatalek pay laeng kenkuna ti Presidente.

Minandaren ni Duterte ti Philippine Drug Enforcement Agency a mangidaulo iti gerra kontra illegal a droga iti laksid ti kinabassit ti puersa dagiti operatibada. Binilinna pay ti Armed Forces of the Philippines a tumulong iti panagaresto kadagiti rinuker a polis ken iti gerra kontra illegal a droga, ngem awan ti  mandato nga agaresto wenno awan ti police power dagiti soldado.

Idi Enero 30, 2017, impalgak ni Dela Rosa ti pannakawara ti PNP Anti-Illegal Drugs Group, ken dagiti amin nga anti-illegal drugs operations manipud iti national agiggana iti station and precint levels.  Naidumduma dayta a nagmalem ken nagpatnag kadagiti naglabas manipud idi nagtugaw da Duterte ken Dela Rosa ta awan ti nai-rekord a biktima ti pammapatay nga adda pakainaiganna iti illegal a droga.

Gapu kadagiti nagsasaruno a krimen a nakainaigan dagiti polis, mabukbukelen ti PNP Counter Intelligence Task Force nga idauluan ni Senior Supt. Chiquito Malayo nga agimbestigar kadagiti rinuker a polis. Manamnama a ti mangidaulo daytoy a Task Force a mangdalus iti PNP ket addaan iti naan-anay nga integridad ken tured tapno maakemna dagiti nadagsen nga annongenna.

Saan a masinunuo no kaanonto a madalusan ti PNP. Kalpasan dayta nga internal cleansing, maisublinto iti PNP dagiti anti-illegal drugs operations tapno mapaksiat ti panagraira ti illegal a droga nga ipangpangruna nga as-asikasuen ti agdama nga administration.

Pinasardeng payen ni Duterte ti NBI a mangisayangkat kadagiti anti-illegal drug operations gapu iti pannakairaman da sigud nga NBI National Capital Region Director Ricardo Diaz ken tallo pay nga opisial iti kaso ni Jee Ick-Joo. Iti agdama, PDEA ken AFP laengen ti pangnamnamaan ti administrasion iti balligi ti kampania kontra illegal a droga.

Manipud iti kari ni Duterte idi kampania a parmekenna ti illegal a droga iti las-ud ti tallo agingga iti innem a bulan, inyalud-odna iti tallo pay a bulan. Ngem insanudna manen nga agtultuloy ti gerra kontra illegal a droga agingga iti maudi nga aldaw ti panagtakemna. Nasuroken a 7,000 dagiti napapatay kabayatan dagiti police operations ken mapapati nga extra judicial killings. No maituloy ti kampania kontra illegal a droga, manonto pay ngata a biag dagiti maibuis tapno agballigiti daytoy a gerra?#

Comments are closed.