Footer

Ti Kayo a Maikuskuspil

Sarita a Para Ubbing ni Jobert M. Pacnis

ADDA kayo a maikuskuspil a nagtubo iti arsadanan ti bantay. Napalalo ti panangum-umsi kenkuana dagiti padana a kayo.

Siitan ti nagan ti kayo. Idinto a nagbassit, napno pay iti siit isu a nanaganan ti kasta.

Pandek!” sangkaumsi kenkuana ni Samak a permi ti kadakkel ken tayagna.

Siitan a pandek!” sangkakuna met ni Alem, ti kayo a kaarngi ni Gmelina.

Kastam la ngaruden, awan pay ti maipapaaymo. Didaka pay mabalin a paglinongan dagiti tumatayab wenno dagiti tao ta maamakda kadagita siitmo!” yumsi met ni Marapapaya.

Napalalo a panangay-ay ni Siitan iti bagina. Ngem ania ngarud ti maaramidanna? Dayta ti pannakaiparsuana ket yamanenna la unayen ta naikkan pay iti gundaway a makakita iti ngayed ti lubong.

Ngem no apay met ngamin nga uyawen ken ikuspilda la unay. No apay ketdi a nagtubo iti nagbabaetan dagiti tallo a kayo a kanayon a mangpasakit kenkuana.

No maikkan ti gundaway, dina kayat a kadenna dagiti tallo. Nauyawda la unay!

Ngem biang laeng ni Siitan ti agan-anus. No nabaelan dagidi dadakkelna ti nagbiag iti sidong dagiti nangumsi met kadakuada, dina ketdin kabaelan?

Isu a kanayon a kunaen ni Siitan iti bagina, “Ala, aganuska, addanto latta gunggonam sadi Ngato.”

Ap-apalan la unay ni Siitan dagiti padana a kayo. Pagaayat dagitoy a pagpallailangan dagiti tumatayab. Da ketdin Kaimito, Bayyabas, ken Mangga la unay. Nagadu a bungbungada nga araken dagiti billit ken ub-ubbing.

Nupay awan met ti bunga da Alem, Samak ken Marapapaya, pagtangsitda met ti kinarukbosda a pagaayat met a paglinongan dagiti tumatayab kasta metten dagiti abuten ti tudo a mapan agan-anup kadagiti ugsa ken alingo iti puseg ti bantay.

Iti maysa nga aldaw, napalalo ti ragsak ni Siitan ta addada tallo nga ubbing a mapasungadanna. Agturong dagitoy iti yanna.

Addan pasangak!” kinuna ti kakuttongan kadagiti ubbing. Itudtudona ti sanga ni Siitan.

Pagan-anom dayta ket nagsiit!” immirugrog ti kapandekan kadakuada.

Wen met ngamin,” kinuna ti maikatlo. “No matudokkad’ta siitna, nalpaskan!”

Wen, aya!” kinuna met laeng ti kakuttongan. “Sumapulak laengen iti sanga ti bayyabas!”

Ket pimmanawen dagiti tallo nga ubbing.

Nalidayan ni Siitan. Kunana itayen no maaramid a pasanga. Adda koma met laengen serbina.

Ne, dida kaykayat!” ingguyab a dagus kenkuana ni Alem.

Napikaran. “Dakayo, apay, napuotanyo kadin nga inaramiddakayo dagiti ubbing a pasangada?” imbalesna. “Saan! Ta ania ngarud ket nagrarasikayo met!”

Nagtitinnaliaw dagiti tallo. Nautobda a husto ni Siitan. Ngem imbes nga agsardengda, ad-adda ketdi nga inkuskuspilda ni Siitan. Ginuyguyaban ken sinapsaplitanda. Naimbag la ketdin ta naamnut ket di natuktukkol dagiti sangana.

PUMARAKAPAK ti tudo kadayta a malem. Napigsa pay ti anginna. Adda kano bagyona.

Aglemmengkan, Siitan, addaytan ti bagyo a mangrungrungdo kenka!” imbugkaw ni Marapapaya ken ni Siitan.

Namigerger ni Siitan. Ania itan ti aramidenna? Iti panagriknana, naidumduma ti sumungsungad a bagyo. Adayo pay laeng ngem kasta unayen ti pigsa ti angin.

Nagkararag ni Siitan. “Sikan, O, Apo, ti makaammo kaniak…” kinunana.

Uray pay kararagka a kararag… awan, dimo maliklikan ti panangsipsippak kenka ti bagyo,” imbutbuteng ketdi ni Samak.

Agaramidka ketdin iti tanemmo,” impasarunson met ni Alem.

Namigergeren iti buteng ni Siitan. Anian, aya, ta di la ketdin naparaburan iti dadakkel a sanga ken puon ta malabananna koma met ti allawig a dumteng.

Ngem kas pammagbaga dagidi nagawan a dadakkelna, aklonenna ti adda a kasasaadna.

Rimmungsot ti aglawlaw.

No kasano ti butbuteng ni Siitan, kasta met ti panagsagawisiw ken panagpaggaak da Samak, Alem ken Marapapaya. Makilinlinnangsotda iti angin. Agsasalada pay.

Huh, kitaennakami, Siitan!” ipukpukkaw dagitoy ken ni Siitan. “Nagmayat ti makilinnailo ken ni Angin.”

Mabutbuteng man, naala latta met ni Siitan ti nangitangwa iti ulona. Pudno, adda dita a makikulkulangtot iti angin dagiti mangikuskuspil kenkuana.

Ngem dina pay naala ti nagdumog, adda ditan ti umatiberret nga angin. Iti apagkirem, naggigiddan a narungdo da Samak, Alem ken Marapapaya. Arig naipunget iti puonda ti pannakatukkolda.

Naulantakda a tallo iti daga.

Natalnan ti aglawlaw iti kabigatanna. Adu dagiti tao a nagpabantay ta agurnongda iti kayo.

Tiamba!” inngirsi ti nakasarak kada Alem, Samak ken Marapapaya. “Adu a pagtungo dagitoy!”

Maasian man, awan naaramidan ni Siitan no di ti nangay-ay iti nagbanagan dagiti tallo. Timmangad.

Agyamanak, Apo, ta inlisinak iti didigra,” naitanamitimna.#

Comments are closed.