Footer

Motorsiklo ti robbery hold-up victim, nasarakan a naabandona

BANTAY, Ilocos Sur – Nasarakan a naabandona iti kalsada ti Barangay Ora West ditoy nga ili ti motorsiklo ti robbery hold-up victim a ginandat pay a patayen dagiti tallo a suspek idi rabii ti Pebrero 28.

Nagresponde dagiti polis ket nagturongda iti nadakamat a barangay kalpasan a nakaawatda iti tawag iti selpon idi agarup 7:20 ti sardam ti Marso 2 manipud iti maysa a maseknan nga umili nga adda naabandona a motorsiklo iti barangay road ti Ora West.

Kalpasan a nagpositibo ti impormasion, bineripika ti polis-Bantay iti Vigan City police station no isu ti motorsiklo a naireport nga intaray dagiti nanghold-ap iti maysa a Mark Anthony Alquetra, 31, naasawaan ken residente iti Barangay Capangpangan, Vigan City idi rabii ti Pebrero 28.

Nagparang a mismo ni Alquetra iti police station ket imbagana nga isu ti nakarehistro nga akinkukua iti lugan a maysa a nangisit a Yamaha Mio ken addaan plaka numero 78693.

Maipalagip a naireport nga adda napasamak a shooting incident iti Barangay Capangpangpangan, Vigan City idi agarup 9:21 ti rabii ti Pebrero 28 a nakainbolbaran ni Fermato.

Segun ken ni Fermato, rummuar koman iti gate ti Cral Louie Vigan Longganisa and Bagnet a kukua ni Louie Alquetra y Arce, 47, naasawaan, ken residente met laeng iti nasao a barangay idi inasitgan ti maysa kadagiti tallo a suspek a nakaaruat iti bonete sana pinaputokan ngem nagmintis.

Pinaltogan manen ti suspek iti namindua ngem nagmintis latta.

Linuganan ti gunman ti motorsiklo ni Fermato sada naglibas iti amianan a direksion ken dagiti dua pay a kumplotna nga agpada a nakaaruat iti bonete a nakalugan met iti sabali a motorsiklo.

Kinuna ni Fermato nga inkabilna iti compartment ti motorsiklona ti P100,000.00 a koleksion ken kuartana a personal.

Mapapati a calibre .38 ti naaramat iti pammaltog kas maibasar iti dua nga slug a narekobre ti SOCO team iti nakapasamakan ti krimen.

Agtultuloy ti inbestigasion mainaig iti nasao a pammaltog. (Tawid News)

Comments are closed.