Footer

OTOP iti Ilocos Sur, maidispley iti maipatakder a Provincial Farmers Livelihood Development Center

Ni Imelda C. Rivero, PIA 1, Ilocos Sur

VIGAN CITY, Pebrero 20 (PIA) – “Dagiti dekalidad a One Town One Product (OTOP) manipud kadagiti 32 nga ili ken dua siudad iti Ilocos Sur ti kangrunaan a maikabil iti maipatakder a dua a kadsaaran a pasdek iti bakante a lote iti amianan ti kapitolio,” kuna ni Gobernador Ryan Luis V Singson kabayatan ti simple a seremonia itay nabiit ditoy.

Indauluan ni Singson dagiti opisial ti probinsia iti napasamak a “ground breaking” iti pakabangonan ti pasdek a maawaganto ti “Provincial Farmers Livelihood Development Center.”

Ti panakaitandudo amin nga OTOP iti Ilocos Sur ti kangrunaan a gagem ti panakabangon ti pasdek gapu ta maiparangto ditoy dagiti amin a produkto a pakabigbigan ti probinsia,” kinuna ni Singson.

Malaksid ti OTOP, addanto met paset ti pasdek a pagsanayan dagiti mannalon ken mangngalap kadagiti kabaruanan a teknolohia ti panagtalon ken panagpatanor ti ikan.

Iti nasao a pasdek, adda met naituding a pagyanan dagiti sumaganad nga opisina ti probinsia a pakaibilangan ti Provincial Disaster Risk Reduction and Management Council (PDRRMC), ti Provincial Tourism Office, ti session hall ti Sangguniang Panlalawigan, ti opisina ti tunggal kameng ti SP, biblioteka ti SP, ken dagiti dadduma nga opisina ti gobierno nasional a kas ti Philippine Information Agency (PIA), ti Philippine Veterans Affairs Office (PVAO), ti NAPOLCOM ken ti National Commission on Indigenous People (NCIP).

Umad-adu met dagiti opisina ti gobierno nasional nga adda iti kapitolio, isu kiddawek ti panagan-anusyo ken panagtitinnulongtayo gapu ta iti mabiit, maikkankayto iti nasaysayaat a pagopisinaan,” kinuna ni Singson.

Kinuna ni Singson nga adda pagparkingan ti lugan ken panganan iti arubayan ti maipatakder a pasdek.#

Comments are closed.