Footer

2 suspek iti pammaltog, nakasuan

STA. MARIA, Ilocos Sur – Napilaan iti kaso dagiti dua a suspek iti pammaltog a nakagudasan ti maysa a katulong sadiay Barangay Maynganay ditoy nga ili itay nabiit.

Murder ti naikaso kada Bonie Dale Tablang y Dasalla ken Rey Donald Tablang y Dasalla, agpada a residente iti nadakamat a barangay gapu iti panangpaltogda a puon ti nakatayanna ken ni Ronald Tablang y Deompoc, 48, awanan  asawa,  katulong, idi rabii ti Marso 4.

Awan ti nairekomenda a piansa dagiti dua.

Saan a nairaman a nakasuan ket nawayawayaan ti maikatlo a suspek, ni Christopher Dela Cuadra, gapu ta saan nga umdas ti pammaneknek maikontra kenkuana.

Mapapati a susik iti daga ti motibo ti pammaltog.

Segun iti panagpalutpot dagiti polis, nakita ni Michael Tablang y Deompoc, 41, mannalon, a binurak dagiti suspek dagiti naikamada a hollow block iti asideg ti Cita Felipe stall ket impakaammona iti kabsatna.

Idi makaasideg ni Ronald, pinaputokan dagiti dua a nagsagrapan ti biktima iti sugat iti bagina.

Naglibas dagiti suspek kalpasan ti pammaltog idinto nga intaray dagiti nagresponde a polis ti biktima iti Ilocos Sur District Hospital, Narvacan, Ilocos Sur a pimmusayanna bayat ti pannakaagasna.

Iti panangproseso ti SOCO team manipud iti Candon City Crime Laboratory Office, nakarekobreda iti crime scene iti walo a kapsula manipud iti cal. 45, maysa a deformed slug manipud iti cal.  45 ken maso a mapapati nga inaramad dagiti suspek a pinangburak kadagiti nakakamada a hollow blocks.

Kabayatanna, naipaima iti Opisina ti Provincial Prosecutor, Vigan City ti kaso a murder para iti preliminary investigation ti maysa nga overeseas Filipino worker ken mapapati a kumplotna mainaig iti pannakapapatay ti maysa a lalaki iti sango ti Mira Hills Restaurant a masarakan iti Barangay Sinabaan, Bantay, Ilocos Sur  idi sardam ti Pebrero 15.

Kaso a murder ti nakaisaklangan ni Eduardo Pastor, OFW, ken residente iti Sitio Fontanilla, Paing, Bantay ken ni Rogelio Rosartio, residente iti Taguiporo, Bantay, mainaig iti pannakapapatay ni Efren Tabu y Tabbal, 34, awanan asawa, ken residente iti Barangay Taguiporo idi agarup 7:06 ti sardam ti Pebrero 15

Maipalagip a nakatugaw ni Tabuy iti nakaparking a motorsiklona iti sango ti nadakamat a restaurant bayat nga ur-urayenna ti kalib-inna a ni Charissa Pastor idi inasitgan ti maysa a lalaki a nakamotorsiklo ket pinaltogan  daytoy iti sumagmamano a beses.

Nakasarak dagiti inbestigador iti 6 a kapsula manipud iti cal. 45, 3 nga slug ken maysa a bullet jacket iti nakapasamakan ti krimen.

Mapapati nga adda saan a panagkinnaawatan ti biktima ken ni Pastor, dakkel a lalaki ti kalib-in ni Tabu, mainaig iti mapapati a saan a nasayaat a pannakamanehar dagiti sanikua ti OFW. (Tawid News Team)

Comments are closed.