Footer

Anti-Illegal Drugs Summit maangay iti Ilocos Sur

VIGAN CITY – Angayen ti gobierno probinsial ditoy ti maysa a summit mainaig iti anti-illegal drugs iti Vigan Convention Center inton Marso 22.

Atendaran dagiti opisial ti probinsia, mamayor, barangay captains, dagiti hepe ti polis, field officers ti Department of Interior and Local government, prinsipal dagiti pagadalan ken presidente dagiti unibersidad, ken dadaulo dagiti estudiante, kinuna ni Governor Ryan Singson a maiyannatup ti maangay nga anti-illegal drugs summit iti kampania ni Presidente Rodrigo Roa Duterte maikontra iti droga tapno mapugipog daytoy ken dadduma pay a klase ti kriminalidad.

Kinuna ti gobernador a panggep ti nasao a taripnong ti pannakapainget iti panangrupak iti droga iti barangay tapno mapugipog ti problema iti probinsia.

Kabayatanna, indeklara ti hepe ti Vigan City police station a nadalusanen ti 28 iti kadagupan a 39 a barangay ti Vigan City iti illegal a droga babaen ti napinget a panagkikinnammayet ti kapolisan ti siudad, dagiti dadduma nga ahensia a mangipatpatungpal iti linteg, lokal a gobierno ken ti komunidad.

Iti nagtipon a miting ti City Peace and Order Council ken City Anti-Drug Abuse Council a naangay iti Vigan City Hall itay nabiit, kinuna ni Chief Inspector Edgardo Medrano, deputy chief of police, a nagtalinaed a bihilante dagiti polis iti Vigan kasta met a napingpinget ti panangibaklayna iti aktibo nga annongenna iti pannakibakal maikontra iti kriminalidad.

Kinuna ni Medrano nga inyenporsar ti kuerpo ti polis iti Vigan City ti agresibo a kampania maikontra iti krimen ken panangiyimplimentarna ti nasaysayaat a koordinasion kadagiti sabali a law enforcement units babaen iti aktibo a suporta ti komunidad iti pannakibakal ken pananglapped iti panagraira iti krimen. (Manipud iti report ni  April M. Montes, PIA 1)

Comments are closed.