Footer

Estudiante, nakumpiskaan iti napagango a marihuana

MAGSINGAL, Ilocos Sur -Kasapulan ti naing-inget a panangsukimat iti bag dagiti estudiante tapno malapdan ti pannakaiserrek ti illegal a droga iti pagadalan.

Mapapati a nalukay ti panagpastrekan dagiti estudiante iti Magsingal National High School sadiay Barangay San Clemente ta adda nasukalan ti maysa a maestra a maiparparit a droga iti uneg ti bag ti maysa nga agbasbasa idi malem ti Marso 9.

Kas maibatay iti report, nakakumpiska ni Mrs. Jheimar Jurado y Peredo, 37, naasawaan, class adviser ti Grade 10, Section Pearl, iti tea bag transparent sachet a nagkarga iti mapapati a nagango a bulong ti marihuana a naikabil iti bag ti maysa nga estudiantena.

Inreport ni Jurado ti insidente ken ni George Urubio, prinsipal ti nadakamat a pagadalan, ket intawag met daytoy babaen ti selpon iti polis.

Iti panagimbestiga dagiti nagresponde a polis, sakbay ti panageksamenda, imbilin ni Jurado ti panangikabil dagiti estudiantena dagiti amin a bagda iti sango ngem saan a nagtungpal ni Andro (parbo a nagan ta menor de edad).

Idi inulit ni Jurado ti instruksionna, inyawat met laeng idi agangay ni Andro ken boluntario a linuktanna ti bag a nakaduktalan ti maysa a tea bag a nagkarga iti nagango a bulbulong a mapapati a marihuana.

Naipan ti menor de edad iti police statio  para iti dokumentasion  sakbay a naipaima iti opisina ti MSWD idinto a naipan ti nakumpiska kenkuana iti police station para iti dokumentasion.#