Footer

BANNER NEWS: Binulto a fruiting tops ti marihuana, nakumpiska iti checkpoint

ALILEM, Ilocos Sur – Binulto a fruiting tops ti maiparparit a mula a marihuana a naikarga iti maysa a lugan ti nakumpiska dagiti polis iti asideg ti pagbeddengan ti Sudipen ken daytoy nga ili idi agsapa ti Marso 16.

Nakasamsam dagiti polis iti 22 a narolio a marijuana fruiting tops ken 10 a pedaso ti bricked marijuana fruiting tops a mapattapatta nga agbalor iti P900,000.00 a nasukalanda a karga ti Mitsubishi Delica a minaneho ti maysa a Benedix L. Bacona, 40, naasawaan, natibo ti Sitio Leggab, Kayapa, Bakun, Benguet ken agdama a residente iti Purok 2, City of San Fernando, La Union.

Nainaganan ti kadua ni Bacona iti lugan a maysa a Luis Laudo y Quan, awanan asawa, drayber, natibo iti Barangay Balili, La Trinidad, Benguet ngem  residente iti Kibungan, Benguet.

Iti body search nga inwayat dagiti polis kadagiti suspek, nakakumpiskada iti P80,000.00 iti nadumaduma a denominasion, maysa a My Phone, maysa a sim card, ken maysa a Samsung Dous cellphone nga addaan iti 2 sim cards.

Iti report manipud iti police station ditoy, nangipasdek dagiti nagtitipon a kameng ti Alilem police station, PIB ISUR, ken PDEA ISSU iti checkpoint iti provincial road iti Barangay Dalawa, ditoy nga ili, partikular iti asideg ti Sudipen-Alilem bridge kalpasan a nakaawatda idi agarup 9:45 ti bigat iti  impormasion manipud iti maysa a kameng ti Barangay Intelligence Network a maysa a Mitsubishi Delica  manipud Kayapa, Bakun, Benguet ti lumasat iti nadakamat a kalsada ti Alilem a mangipuslit iti kargana a marijuana fruiting tops.

Idi agarup 10:30 ti bigat ti dayta met laeng nga aldaw, nasaripatpatan dagiti polis ti nadakamat a lugan ket  pinasardengda daytoy sada sinukimat ti uneg ti lugan a nakaduktalanda kadagiti naikarga a marijuana fruiting tops.

Sinaksian dagiti barangay officials ken pannakabagi ti Department of Justice ti panangimbentario dagiti polis kadagiti nasamsamda iti uneg ti lugan ken iti ikut dagiti suspek.

Naipan dagiti suspek ken dagiti nakumpiska kadakuada iti police station para iti maiyannatup a disposision. (Tawid News)

 

Comments are closed.