Footer

Motorsiklo ti waiter, natakaw

VIGAN CITY – Iti baet a natulbekan, natakaw latta ti maysa a motorsiklo nga imparking ti akinkukua iti asideg ti otel a pagtrabtrabahuanna idi malem ti Marso 16.

Iti pulong ni Peter Dietrich Cardenas Barnachea, 32, naasawaan, waiter, idi agarup 1:30 ti malem ti nadakamat a petsa, imparkingna sana tinulbekan ti Yamaha TFX 150 BY61 a motorsiklona iti General Luna Street, Barangay 1, partikular iti abagatan a paset ti Hotel Salcedo a pagtrabahuanna sa simrek iti trabahona.

Ngem idi mapan kitaen ni Dietrich ti motorsiklona idi agarup 8:30 ti sardam, awanen ti luganna iti nakaiparkinganna.

Apaman a naawatda ti pulong, nagsawar dagiti polis ngem saanda a nabirokan ti motorsiklo.

Negatibo met ti resulta ti flash alarm nga impatulodda kadagiti kabangibangda a police station.#

 

Comments are closed.