Footer

Presio ti karne ti baboy iti Vigan City, ngimmato

VIGAN CITY – Makabulan sakbay ti idadateng ti Semana Santa a panagdadarison dagiti turista ditoy siudad, kellaat nga ingngato dagiti aglaklako iti karne ti baboy ti presio ditoy siudad.

Iti maysa nga interbiona iti lokal a telebision ditoy, impakaammo ni Romeo Adolfo, presidente ti Vigan City Meat Vendors Association, a manipud iti Marso 14, ingngatoda ti presio ti karne ti baboy manipud iti P170 kada kilo iti P180.00 kada kilo nga uray awan pay ti pammalubos manipud iti sangguniang panlungsod ti Vigan wenno public hearing a maangay mainaig iti panangingatoda iti presio ti karne ti baboy.

Inkalintegan ni Adolfo a pagbatbatayanda ti maysa a memorandum of agreement a nagpinnirmaan ti VMVA ken ti sangguniang panlungsod iti panangingatoda iti presio ti karne ti baboy a mailako iti tiendaan publiko ditoy siudad.

Kinuna ti presidente ti grupo dagiti aglaklako iti karne a nakalanad iti MOA a no nababbaba ngem P120 kada kilo ti presio ti liveweight a baboy, automatiko nga ibaba ti presio ti lakoda a karne ti baboy iti P170 kada kilo.

“Ngem no ngumato ti presio ti liveweight a baboy iti P120-130, mabalinmi nga ipangato ti presio iti P180.00 kada kilo,” kinuna ni Adolfo.

Inyunay-unay pay ni Adolfo a no ngumato pay ngem P130 ti presio ti liveweight a baboy, mangaramidda a meat vendors iti petision letter a maidatag iti city council para iti pannakatratar ti   pannakaingato ti presio ti karne ti baboy.

Kas kapaliiwan,  ngumina ti presio dagiti tagilako iti tiendaan publiko gapu iti panagdadarison iti Vigan dagiti turista tapno umayda paliiwen ti Semana Santa ditoy siudad. (Tawid News)

Comments are closed.