Footer

Traysikel, naitapuak iti kanal, 3 nadunor

SANTA, Ilocos Sur – Tallo a tattao ti nadunor idi naitapuak ti traysikel a naglugananda iti kanal kalpasan a napukaw ti drayber ti kontrolna iti manibela iti pagkurbaan sadiay Barangay Magsaysay District idi parbangon ti Marso 16.

Naitaray iti Gabriela Silang General Hospital, Vigan City, da Fortunato Luis y Saez, 33, awanan asawa, nagmaneho iti traysikel,  ken dua a pasaherona a managan Dennis Savellano y Carbonell, 27, naasawaan, ken Loreto Savellano y Carbonell, 34, naasawaan, residenteda amin iti Brgy. Cuancabal, Cabugao, Ilocos Sur.

Saan a naan-ano ti sabali pay a naglugan, ni Roland Sabugo y Lumaan, 44, awanan asawa.

Segun iti panagimbestiga dagiti polis, agtartaray nga agpaabagatan ti traysikel a minaneho ni Luis ngem iti pagkurbaan ti Barangay Magsaysay District, napukawna ti kontrolna iti manibela ket natnag daytoy iti kanal sa nabaliktad.

Nakainom amin dagiti biktima idi madesgrasiada.#

Comments are closed.