Footer

Grade II pupil, nalmes

QUIRINO, Ilocos Sur – Palagip kadagiti nagannak: siguraduenyo a sumsumrek iti klase dagiti annakyo amangan no aglanglanganda tapno laeng mapanda agdidigos iti karayan.

Kas maibatay iti police blotter ditoy, maysa nga agtawen iti walo nga agbasbasa ti naireport a nalmes iti karayan bayat ti panagdidigosda idi malem ti Marso 20 idinto nga adda koma iti pagadalan iti dayta nga oras.

Segun iti report, saan a simrek iti klaseda iti malem da Melvin Bilog y Linbanen, 8, Grade II pupil ken residente iti Sitio Bucnit, Barangay Namitpit, ditoy nga ili ken sumagmamano a di nainaganan a gagayyem ken kaeskuelaanna iti klaseda ket napanda nag-lalangoy iti Karayan Lagben partikular iti Kaang ti nadakamat a sitio.

Bayat ti panagdidigos dagiti ubbing, dida nadlaw ti panagpukaw ni Bilog ket nagbalawda laengen idi saanda a mabirokan isu a naggawidda a nangireport iti insidente.

Nagsawar dagiti agindeg ti Sitio Bucnit ket nasapulanda ti biktima iti lansad ti karayan idi agarup 4:30 ti malem.

Intarayda ni Bilog iti Quirino Rural Health Care Facility ngem impakdaar ti doktor nga awanen ti biag ti biktima.#

Comments are closed.