Footer

Peke a sigarilio iti nagduduma a brand, nasalamaan a mailaklako

STA. CRUZ, Ilocos Sur – Dua a lalaki ti inaresto dagiti polis ditoy gapu iti panagla-koda iti mapapati a peke a sigarilio a partuat ti maysa a kompania ti sigarilio sadiay Barangay Amarao idi malem ti Marso 18.

Kalpasan a nakaawatda iti mensahe manipud iti maysa a maseknan nga umili a dua a lalaki ti natiliw dagiti field employees ti Mighty Corporation nga agilaklako iti peke a Mighty cigarettes ken dadduma a sabali a cigarette brands iti nadakamat a barangay, nagresponde dagiti polis ket nadatnganda ti maysa a traysikel a tinengngel dagiti empleado ti Mighty Corporation a nairana a madama ti distribusionda iti daytoy a sigarilio iti bisinidad iti dayta nga oras.

Segun iti report, nakaawat iti report manipud kadagiti kustomerda ni Reynaldo Fetalvero y Taganas, 29, naasawaan, field unit manager ti Mighty Corporation a nakabase iti Barangay Balaleng, Bantay, Ilocos Sur, nga adda dua a distributors a naglako iti peke a Mighty cigarettes.

Mapapati a nasalamaan da Fetalvero ti 125 EXT motorcycle nga addaan sidecar a nagkarga iti produkto a sitsaron ken kinarton a sigarilio ket kinamatda ti lugan agingga iti naipiskotda iti asideg ti karayan a sakup ti Barangay Amarao.

Nabigbig idi agangay dagiti naglugan iti traysikel a da Julius Dri Torres, 25, naasawaan, ken Daniel Delfino Matangat, 18, ken agpada a residente iti San Pascual, Talavera, Nueva Ecija.

Nasukalan iti traysikel ti 117 reams ti peke a sigarilio iti nadumaduma a brand a pakairamanan ti Mighty cigarettes.

Daytoy ti umuna a gundaway nga adda naireport a mailaklako ditoy probinsia a peke a sigarilio a pakaibilangan ti produkto ti Mighty Corporation.

Idi Marso 1, naipadamag kadagiti pagiwarnak ti panangraut dagiti nagtitipon nga elemento ti Bureau of Internal Revenue, Bureau of Customs ken lokal a polis iti warehouses sadiay San Simon, Pampanga ken General Santos City a nakasamsamanda kadagiti naibodega a kinarkarton a sigarilio ti Mighty cigarettes a mapapati nga addaan iti peke a tax stamps. (Tawid News)