Footer

ANNINIWAN TI NAPALABAS

Sarita ni Rosalyn Del Prado

(Tuloyna)

 

Nagkasangay ni lakayko ket pimmarti iti kalding. Inawisna amin a kabunggoyanna a nakairamanan ni Mr. Ramos. Nagiinumda iti serbesa. Ti la nagturturongan ti saritaanda ken Mr. Ramos.

“Dimon sa met malagipen ti mangasawa, ading,” kinuna ni lakay. No addakam iti ruar ti pagadalan, ading wenno manong ti awagmi ken ni Mr. Ramos. Naas-asideg kano no kasta.

“Naikari ngata nga aglaklakay datao, Manong,” kinunana.

“A, dayta ti nakaladladingit,” kinuna ni lakay. “Ti agayat ken paayat ti kaimnasan a sagut ti Namarsua kadatayo, saan kadi?”

“Mamatiak iti kunam, Manong,” kinuna ni Mr. Ramos. “Ngem adda pay kari a masapul a tungpalek. Saanak a mangasawa agingga iti diak malitupan ti maysa a biddut a naaramidko iti napalabas.”

“Biddut? Ania dayta?” nasaludsodko.

“Maysa a rabii, liman a tawen ti napalabas, adda babai a naam-ammok iti Burnham Park,” inrugina. “Nakaaramidak iti babak iti dayta a babai. Liman a tawen a birbirokek. Kayatko nga ugasan ti nagbasolak kenkuana.”

“Mariknak ket nadagsen unay ti nagbasolam iti dayta a babai,” kinuna ni lakay.

“Mabalin a kaguradak no maammuanyo ti naaramidko, Manong.”

“Mailasinmo no agsarakkayo? Nawatiwat ti lima a tawen…”

“Mailasinko. Kaing-ingas ni Nenita.”

Diak ammo no ania ti naknakanko ta naisalpikak ken ni Nenita ti inlatak ni Mr. Ramos. Limmusiaw. Nagtigerger. Kasla napakapsutan a kimpet iti lamisaanna. Inatibayko nga impatugaw.

“Anian sa ti mapaspasamakmo?” nakunak.

“A-awan aniamanna daytoy, Manang.”

Iti malem, naglangan ni Nenita. Uray iti sumuno nga aldaw. Naammuak a masakit. Sinarungkarak. Pinilitna ti immisem idi kablaawak. Naasianak. Kasla nagkautan dagiti matana.

“Nenita, dika koma agulbod,” nakunak. “Adda dakkel a parikut a mangburburibor kenka.”

Saan a nagtimek ni Nenita. Imbaw-ingna dagiti matana.

“Kitaem ta langam, nakuttongkan. Apay a dimo ibaga kaniak bareng matulonganka?”

“Dinak matulongan, Manang. Awan ti makatulong kaniak.”

“Kitaennak, Nenita. Adda kadi pakainaigan ni Mr. Ramos?”

Nabayag a di nagtimek ni Nenita. Nagarimayang ti luana iti itutung-edna. Inawidko ket binay-ak a nagsangit iti abagak.

“Please tell me, Nenita.” kinunak.

“Naim-imbag a dimon maammuan, Manang.”

Pinunas ni Nenita ti luana. Manipud iti uyosen ti lamisaan maysa a sobre ti inruarna sana inyawat kaniak.

“Pakiyawatyonto man la ken ni Mr. Ramos daytoy resignation letterko, Manang,” kinunana.

“Agikkatkan? Ti la mapampanunotmo.”

“Daytoy laeng ti ammok a pamuspusan tapno agtalna ti nakemko. Umadayoak a dagus ditoy.”

Di nakatimek ni Mr. Ramos kalpasan ti panangbasana iti resignation letter ni Nenita. Impudnok ti nagpatanganmi ken Nenita.

“Manang, nagbasa kadi ni Nenita idiay Baguio?” sinaludsodna.

“Wen. Iti BCF.”

“Kaano ti panagturposna?”

“No diak mariro, lima itan a tawen.”

Nasipatna ti lamisaanna. “Bulsekak nga agmamata!” naipigsana.

Nagsennaay. Ket naammuak ti palimed a kinutkutimanna iti lima a tawen.

Kalgaw idi ket agbasbasa ni Mr. Ramos iti Unibersidad ti Baguio. Iti maysa a rabii, nagpallailang iti Burnham Park. Maysa a babai, agmaymaysa, ti nakaawis iti imatangna. Inasitganna ket naammuanna nga adda nadagsen a parikut ti babai. Ageksamen kano ngem awan pagmatrikulana. Ul-ulilan ti babai ta natay dagiti dadakkelna iti maysa nga aksidente a napasamak iti nabiit pay. Immapay iti panunot ni Mr. Ramos a kalapati a nababa ti tayabna ti babai. Kas ninamnamana, indiaya ti babai ti bagina kas sukat ti gatad a masapulna. Nagkitakit ni Mr. Ramos ngem nagpakpakaasi ti babai kenkuana. Naallukoy met laeng ni Mr. Ramos. Inserrekna ti babai iti hotel. Sadiay, natakuatanna a birhen pay.

Manipud idi, saanen a nagtalna ti nakem ni Mr. Ramos. Sinapulna ti babai iti Burnham Park, kadagiti pagadalan iti siudad ngem dinan nakita.

“Manang, kapkapnekak itan a ni Nenita daydi a babai,” inggibus ni Mr. Ramos.

Nabayag a naikulengak iti nangngegko.

“Ania ita ti panggepmo nga aramiden?” nakunak.

“Lima a tawen a binirbirokko, Manang. Ti kunam, ipalubosko pay a mapukawko manen?”

Insursurotko ti panagkitak ken ni Mr. Ramos a kasta unay ti pardasna a mangun-unor iti dalan nga agturong iti balay ni Nenita. Ah, mannakabalin nga agpayso ni ayat, nakunak ket nakullaapan dagiti matak iti ragsak.#

 
Comments are closed.