Footer

ANNINIWAN TI NAPALABAS

Sarita ni Rosalyn Del Prado

(Umuna a paset)

MADAMA ti komperensiami ken Mr. Alones, ti superbisor ti distrito ti Quirino, maipapan kadagiti report a maidatag iti division office idi matugtog ti ridaw ti opisina. Timmakderak ket kinitak no asino.

Naimbag a malemmo,” inisemannak ti sangaili. “Adda kadi ni Mr. Alones?”

Adda, sir,” insungbatko. “Sumrekkayo, a.”

Umayak agreport, sir,” kinuna ti sangaili ken ni Mr. Alones. “Siak ti imbaon ni Mr. Cruz a mangsukat ken ni Mrs. Corpuz.” Ni Mr. Cruz ti Schools Division Superintendent iti probinsia ti Ilocos Sur. Nagretiro itay napan a lawas ni Mrs. Corpuz, ti prinsipalmi iti Quirino Central School.

Inyawat ti lalaki ti papelesna. Binasa ni Mr. Alones. Kalpasanna, inyam-ammonak. Jose Ramos ti naganna. Taga-Vigan. Uppat a pulon ti tawenna. Baro. Kalalainganna ti pammagina iti tayagna a lima kadapan ken lima a pulgada. Panguloten, no umisem, agminar ti bugbugtong a kallidna.

Welcome to Quirino, Sir,” kinunak.

Napintas ti lugaryo,” kinunana. “Nadalus ti angin, saan a kas iti Vigan a natapok ken napudot. Magustuan la ketdi ti bagik ditoy.”

No maanusanyo la ketdi ti rigat, Sir.”

Mrs. Ringis, di la mabalin nga awagam amin a mangisursuro?” kinuna ni Mr. Alones. “Adda mitingtayo iti library.”

Wen, Sir,” insungbatko.

Nabiit a naurnongkami iti library.

Naanus met la ngata a kas ken ni Mrs. Corpuz?” sinaludsod ni Miss Tabboga, ti pangrapisen a maestra ti Maikamaysa.

Nalaing met iti panagkitak,” insungbatko.

Baro kano pay,” kinuna ni Mrs. Reynon, ti in-charge iti Grade IV. “Addayta, gundawaymon, Andring,” inkalbitna ken ni Mrs. Dumbrique, ti biuda a maestra ti Maikadua.

Padpadasennak a kalbiten ta kitaenna no diak tiliwen,” inkidday ni Mrs. Dumbrique. Nagkakatawakami.

Awanen, nanglaylaykan, Manang,” kinuna ni lakayko. “Itedmo la’ngen kadagiti ub-ubbing barbareng no maigawid ditoy Quirino.” Insungo ni lakay ni Miss Tecson, ti mangisursuro iti Home Economics. Nasuroken a tallopulo ni Miss Tecson ngem kalaslasbanganna.

Siak manen ti nakita ni Manong Lando,” kinuna ni Nenita.

Kas guidance counselor, managadalak iti karirikna ti tao iti nadumaduma a situasion. Idi sumrek da Mr. Alones ken Mr. Ramos, ni Nenita ti pinaliiwko. Kellaat ti ibebessag ni Nenita. Naikuleng met ni Mr. Ramos a bulon ti panagkarenken ti nawada a mugingna. Ngem apagdarikmat laeng, immisem ni Mr. Ramos ket intuloyna ti nakiam-ammo kadakami.

Iti recess, inyawis ni Mrs. Almendras, ti Coop Teacher, ti panagmeriendami. Nakitungtong ni Mr. Ramos ngem masansan ti itataliawna ken ni Nenita. Pamrayan ni Nenita ti agdumog wenno sipapasnek kampay a dumdumngeg iti sasawen ni Mrs. Reyes. Naulimek man ita ni Nenita idinto a saan met a kasta. Madamdama, nagpadispensar ket imbagana nga adda pay board work nga ikamakamna.

Idi agawidkami, naisalpikak ken ni lakay dagiti napaliiwko. Amin la a madmadlawmo, nakunana.

Dakkel ti nagbaliwan ni Nenita. Iti recess, nakairuamanmi ti agtutungtong iti library. Ita saanen a rumrummuar iti kuartona. Iti bigat, masapa a sumrek, agdiretso iti kuartona ket sa la rummuar iti flag ceremony. Iti malem dinakon urayen nga agawid. Kanayon a kasla nauneg ti pampanunotenna ket saanen a managisem. Kimmuttong.

Adda kadi kinagura ni Nenita kadatayo?” nakuna ni Mrs. Almendras.”

Awan met ti ammok,” kinuna ni Miss Alcedo.

Adu ngata ti trabahona,” inkalintegak ni Nenita.

Inkeddengko a kasaritak. Rinantak iti kuartona iti maysa a malem.

Adda pay trabahuem?” inamadko.

Awanen, Manang,” insungbat ni Nenita. “Agawidakon.”

Agkuyogta ngaruden,” kinunak.

Tinulongak a nagiserra kadagiti tawa. Inalikumkomna dagiti gargaretna. Kalpasan ti panangkandadona iti ridaw rimmuarkami iti pagadalan.

Ammom,” kinunak, “dumdumlaw man dagiti kaduatayo kenka.”

Apayen, Manang?”

Saanka metten a makium-ummong kadakami.”

Adu ngamin ti asikasuek iti klasek, Manang.”

Uray ni Mr. Ramos, dumdumlaw kenka.”

Napasardeng ni Nenita. “A-ania ti nasasaona, Manang?”

Kaska la kano kigaw.”

A-awanen ti sabali a nasaona, Manang?”

Dayta laeng,” kinunak. “Ania koma pay ti masaona maipapan kenka?”

Saan a nagtimek. Indarumogna ti nagna.

Nenita, adda kadi problemam?”

A-awan, Manang.”

Immangesak iti nauneg. “Ala, awan no awan. Dika ngarud agpuppupok latta iti kuartom. Umaliwaksayka sagpaminsan tapno awan ti dumlaw kadagiti kakadua.”

(Maituloyto)

Comments are closed.